HALOS TATLONG LINGGO na ang nakararaan nang may namuong ‘away’ sa pagitan ng ex-lovers na sina Angel Locsin at Luis Manzano. Sa Twitter lamang naglabas ng kanyang ‘sama ng loob’ itong si Angel laban sa ex at sa Twitter din humingi ng kanyang ‘dispensa’ si Luis.
Matapos nito, biglang nanahimik ang magkabilang kampo. At noong nakaraang linggo, dalawang malalaking endorsements ang magkasunod na ni-launch para kay Angel, isang brand ng shampoo at isang brand ng canned tuna. Sa dalawang event na ito, ayaw pag-usapan ni Angel ang nasabing girian nila ni Luis at ang tangi na lamang niyang nasagot, “Tapos na ‘yun, huwag na po nating pag-usapan, kasi nag-sorry na naman siya.”
Sana lang, all’s well that ends well na nga ito, dahil masaya na si Angel sa piling ng kanyang ‘exclusively dating’ na si Phil Younghusband.
HINDI MAN SIYA ang tinanghal na Ultimate Star Factor Grand Winner ng TV5, patuloy pa rin sa kabi-kabilang raket sa ngayon si Miguel Estenzo.
Isa nga sa mga pinagkakaabalahan ni Miguel ngayon ay ang dula sa entablado na Noli Me Tangere ng Tang-halang Pilipino. May angking galing din pala sa pag-awit itong si Miguel, kaya naman naisama siya sa hilera ng mga theater actors sa malapit nang itang-hal na stage play. Goodluck, Miguel!
NGAYONG ARAW, JULY 13, ang nakatakdang pangalawang barangay hearing sa Poblacion, Makati para sa nag-akusang mga kasambahay ng Diamond Star na si Maricel Soriano. Ito ay alinsunod sa reklamong isinampa nina May Cachuela at Camille Acojeda kaugnay sa diumano’y pananakit sa kanila nang magaling na aktres.
Matatandaang hindi sinipot ni Maria ang naunang nakatakdang paghaharap sana nila sa barangay noong July 6, 2011 sa ‘di malamang kadahilanan. Halos isang oras ang hinintay nina May at Camille pati na ng mga miyembro ng media, pero ni representative ay walang ipinadala ang kampo ni Maricel.
Ayon naman sa mga nakausap namin sa barangay, tatlong hearing ang kanilang ipatatawag at dapat ay dadaluhan ito ng magkabilang kampo upang mapag-usapan ang mga bagay-bagay sa barangay level pa lamang. Dito, hihimayin at maaaring hindi na maiakyat pa sa korte ang reklamo kung magkakaayos ang dalawang panig.
Ayon naman sa dalawang kasambahay, hindi pa nila alam kung mapapatawad nila ang kanilang dating amo. Ito ay depende pa raw sa kanilang mapag-uusapan kung saka-ling magkaharap-harap na nga sila.
BLIND ITEM: KINSA Sila? Sinu-sino kaya itong dalawang personalidad na ayon sa kuwento ng aming very unimpeachable source ay nagpapataasan daw ng pride?
Base sa kuwento, sa isang TVC shoot sa isang endorsement na kanilang pagsasamahan, hindi raw pumayag si sikat na Actress A na makasama si sikat na Actress B. Kaya ang ginawa raw ng production, magkahiwalay na araw ang shoot ng dalawa at kuntodo sukat sila sa mga anggulo.
Hirap na hirap daw ang mga staff sa pagsukat ng tamang anggulo para hindi mahalatang ipinatong lamang ang video ng dalawang actress kapag lumabas na ang nasabing TV ad. Ang dialog daw nang sikat na Actress A ay, “Ayoko siyang makasama sa shooting,” patungkol kay sikat na Actress B. Dialog naman nang mga taga-production, “Ang arte-arte naman niya eh, hindi na siya bata, ‘noh.”
Sinu-sino sila? Maging mapanuri sa mga commercial na ipinapalabas sa ngayon at matutumbok n’yo na kung sinu-sino sila.
Follow me on Twitter, @arnielcserato; e-mail your blind items and hottest showbiz scoops sa [email protected].
Sure na ‘to
By Arniel Serato
