NAHIYA NAMAN ako kung isnabin ko ang birthday party ni Shalani Soledad-Romulo kasi hindi na nga ako nakadalo sa kasal nila ni Cong. Roman Romulo. Kaya pinuntahan ko na talaga nu’ng nakaraang Biyernes sa tahanan nila sa Valle Verde 3, Pasig.
Akala ko nga, intimate party lang. Malaking handaan na rin pala na ikinagulat niya, dahil inayos ito mismo ni Cong. Roman.
Iyon lang daw ang kaibahan ng birthday niya ngayon bilang Mrs. Romulo, dahil meron nang nag-aasikaso para sa kanya. Dati, siya mismo ang nag-aayos, pero ngayon nagulat na lang daw siya pagbalik niya mula Cebu, meron na palang nakahandang party para sa kanya.
Si Cong. Roman mismo ang aligaga sa pag-asikaso at may inihanda pang regalo sa kanya. Kaya lang, ayaw naman nilang sabihin kung ano ito, dahil tingin ko super mahal ‘yun.
Nakausap nga ng Startalk ang mag-asawa at so far, ini-enjoy lang daw muna ang kanilang pagsasama dahil wala pa silang baby. Parang nagha-honeymoon lang daw sila araw-araw. Sabi nga ni Shalani, sana ganu’n na lang daw sila hanggang sa pagtanda nila. Pero gusto naman nila, marami silang anak, kaya pinaghahandaan na nila ito ngayon.
Kung si Shalani ang masusunod, gusto raw sana niya, baby boy ang first baby nila. Si Cong. Roman, kahit ano raw basta may baby na sila.
Kung kakayanin daw ngayong taon, gusto na niyang mabuntis para sa susunod na taon, concentrate na si Shalani sa pag-alaga ng baby.
Natanong na rin pala ng Startalk si Shalani tungkol sa relasyon nina Pres. Noynoy Aquino at Grace Lee. Mukhang masaya naman daw silang dalawa, kaya masaya na rin daw sila.
Hiningan nga ito ng payo para kay Grace, pero tingin naman daw ni Shalani, smart at matalino naman si Grace Lee kaya hindi na raw siguro kailangan ang payo niya.
Sa 2013 elections ay tatakbo sa mas mataas na posisyon si Shalani, pero hindi pa niya masasabi kung Mayor, Vice Mayor o sa Congress dahil pinag-uusapan pa raw nila.
Kung sakaling nasa iisang partido pa rin sila ni P-Noy, okay lang daw sa kanya na makatrabaho ito alang-alang sa ating bansa.
So far, hindi pa raw sila nagkita ni P-Noy pagkatapos ng kasal nila ni Cong. Roman.
NAGALIT PALA si Aiza Seguerra nu’ng nagpa-interview ang dating karelasyon nitong si Chen Sarte. Mahigit pitong taon din ang kanilang relasyon at nagkahiwalay sila nu’ng nakaraang taon pagkatapos lang ng Protégé, kung saan nanalo roon si Aiza.
Natsismis pa nga nu’n na ang dahilan daw ng hiwalayan nila ay ang protégé na inalagaan nito sa naturang talent-reality show. Pero pinabulaanan ito ni Chen. Wala raw kinalaman ang kung sino man na na-link kay Aiza dahil maayos daw nilang napag-usapan ang kanilang paghihiwalay at parehong desisyon daw nila ito.
Sabi pa ni Chen nu’ng nakausap ito ng Startalk sa general assembly ng OPM nu’ng nakaraang linggo, “It’s a professional decision. It’s easy to move on, and like I said before, ang dami niyang (Aiza) itinuro sa akin in this industry. So, I think I am trying to move on and start again.”
Tuloy pa rin nga ang pagma-manage niya ngayon at meron na siyang mga bagong singers na mina-manage. Pero tumatanggap pa rin naman daw siya ng booking para kay Aiza na idinadaan na niya sa bagong manager nitong si Annabelle Regalado. Wala raw silang komunikasyon sa ngayon at open daw siya sa posibilidad na maging friends sila.
Ewan ko lang kung posible ‘yan dahil nagalit na nga si Aiza sa interview na ito ni Chen.
Sinubukan kasi ng Startalk na kunan ng statement si Aiza pero tumanggi ito. Nag-text lang ito sa staff namin na ayaw na niyang patulan pa dahil matagal na raw silang hiwalay ni Chen bakit nagpapa-interview na ito ngayon. Gusto lang daw niyang maging pribado na ang personal na isyu nito. Kaya bakit nagpa-interview pa raw si Chen na hindi naman daw nila ito ginagawa.
Nag-text lang ito sa Startalk staff namin ng kanyang statement na halatang galit nga ito.
Ayon kay Aiza, “She broke with me several times already. Final break was October of last year. So, I don’t know why ngayon siya nagpapa-interview. I don’t know kung bakit kailangan niyang magpa-interview at magsalita about our private lives na never naman naming ginawa before.”
Kuwento naman ng reporter namin, napilitan lang daw talaga na magsalita si Chen dahil hindi na ito hiniwalayan ng reporters.
Siyempre hindi naman daw siya sanay sa mga ganu’ng pang-a-ambush ng reporters. Nahiya lang siguro ito tumalikod at baka pagsabihan pa siyang nambastos sa mga reporter.
Mga Mata ni Lolita
by Lolit Solis
