PARANG AYOKO NAMANG maniwala sa isyung kinasasangkutan ngayon ni Andi Eigenmann na kasali pa naman sa paborito kong pinapanood na Minsan Lang Kita Iibigin.
Obvious kasing siya ang tinutukoy sa blind item na nabuntis daw ng anak ng isang maimpluwensiyang pulitiko.
Kilala ko naman itong napabalitang boyfriend ni Andi, pero parang hindi naman kapani-paniwala dahil napapanood ko naman siya sa teleserye nila sa ABS CBN 2.
Tinatanong ko naman ang mga alaga ko sa Minsan…, itinatanggi naman nila ang intrigang ‘yun.
Wala naman daw silang naririnig na ganu’ng intriga kay Andi. Nakakatrabaho naman daw nila sa taping at wala naman daw problema.
Nakakaduda lang dahil hindi ito sinasagot ni Andi. Kahit ang Mommy nitong si Jaclyn Jose, tahimik din at hindi sinasagot ang mga reporter na gustong malaman kung ano ang totoo.
Pero siguro, tingin ko naman diyan ayaw na lang nilang patulan kaya tahimik na lang sila.
Tingnan na lang natin kung mawawala si Andi pagkatapos ng taping ng Minsan…, dahil malapit na itong matapos eh.
ANG GANDA PALA nitong anak nina Monching Gutierrez at Lotlot de Leon na si Janine Gutierrez.
Ini-launch itong si Janine na 21 years old na pala, sa Party Pilipinas nu’ng nakaraang Linggo. Marami ang pumuri sa kanya dahil napakaganda naman kasi talaga.
In fairness dito kay Janine, naka-graduate siya sa Ateneo ng kursong European Studies kaya pinayagan na ito ng magulang niya na mag-artista. Matagal na iyang kinukumbinsing mag-artista pero tinapos muna talaga niya ang kanyang pag-aaral.
Sa ngayon ay magiging regular muna si Janine sa Party Pilipinas dahil pinagwu-workshop muna siya ni Lotlot sa acting at nagbu-voice lesson pa. Gusto naman daw niya, marunong na talaga ito bago isalang sa mga project na ibibigay ng GMA-7.
Si Lotlot pala ang tatayong manager niya pero sabi niya sa amin, never daw siyang maging stage mother. Basta nandiyan lang daw siya para suportahan ang showbiz career nito.
Suportado rin si Janine ng buong pamilya dahil du’n sa launching niya sa Party Pilipinas, nandu’n din ang Daddy niyang si Monching pati ang tita niyang si Jackie Lou Blanco.
Hindi nga lang pumunta roon si Pilita Corales pero nagkita naman pala sila ni Janine para magpaalam. Tinuruan pa raw siya ni Pilita ng pagkanta at tamang attitude sa stage.
Isa na naman ito sa mga bagong mukha na aabangan sa showbiz.
‘Di ba ang ganda ng lahi ni Nora Aunor? Tingnan na lang natin ‘pag bumalik na rito si Ate Guy!
Mga Mata ni Lolita
by Lolit Solis
