ASTIG ANG PANININDIGAN ni Lovi Poe pagdating sa hamon ng kung anu-anong intriga na pupuwede niyang maranasan dito sa showbiz. Kaya naman hanggang ngayon ay hindi talaga siya napapabagsak ng kung sinu-sinong kumakalaban sa kanya sa industriyang ito. Iyon daw ang namana niya sa yumao niyang daddy na si Fernando Poe, Jr. Gaya ni FPJ ay marunong rumespeto si Lovi sa mga nakatatanda, ganu’n din sa mga taong nakakatrabaho niya ngayong artista na nga siya.
Marunong makiramdam at mag-adjust si Lovi sa kanyang paligid. Kapag sa isang pagtitipon sa showbiz, aware siya na naroon ang malalapit na tagasuporta ng tunay na pamilya ng kanyang daddy. Kaya lumulugar siya sa dapat niyang kalagyan. Kung pinapansin at binabati siya ng mga tao roon, nagbibigay-galang siya. Pero kung nararamdaman niyang hindi siya gusto ng mga tao sa paligid, nagsasawalang-kibo na lang siya at hindi ipinipilit ang kanyang sarili.
Nitong magdalaga siya at maging ligawin, nang magkasunod na ma-link siya kina Jolo Revilla at sa anak ni Governor Chavit Singson na si Mr. Ronald Singson, pinagbibintangan si Lovi na MATERIALISTIC daw at mahilig sa mamahaling regalo. Hindi na lang niya pinapansin ang mga intrigang iyon. Kapag nasa loob ka kasi ng isang relasyon, normal na talaga ang pagbibigayan ng mga regalo. Mas nakahihiya naman siguro na ang mga anak-mayamang sina Jolo at Ronald ay magregalo ng mumurahing bagay sa isang babae na naging espesyal para sa kanilang dalawa, ‘di ba?
HINDI LANG NAMAN si Maxene Magalona ang nagdusang maging Negastar dahil sa pagkakasangkot niya sa kontrobersiya bunga ng pinasikat nilang Ampalaya Anonymous. Maging si Angel Locsin ay nagiging Negastar din ngayon, dahil isa siya sa unang nagtanggol sa nasabing grupo, na diumano’y biru-biruan lang naman daw. Pero dahil sa mga kanegahan na nangyari, lumilitaw na nagkaroon talaga ng pagpapatutsada sa ibang artista, sa pamamagitan ng kanilang Twitter account.
Kaya nga hindi na muna itinuloy ang unang plano na pagsamahing bida sa isang teleserye ng GMA-7 sina Maxene at Pauleen Luna, dahil naging kontrabidang antipatika ang anak ni Pia Magalona, at ang alaga nga ni Manay Lolit Solis ang nabiktima diumano ng kanilang mga patutsada. Magsasama rin naman daw sa project sina Maxene at Pauleen, medyo nagpapalamig lang muna, dahil talagang hindi naging maganda sa pandinig ng showbiz ang Ampalaya Anonymous.
Kaya dapat din munang magpalamig si Angel. Kasi nga, si John Lloyd Cruz ang kapareha niya sa bagong teleserye niya sa ABS-CBN, ang Imortal. Hindi talaga makatutulong sa medyo lumamlam na career ni Angel ang mabanggit ang kanyang pangalan, bilang kasama sa Ampalaya Anonymous na kinabibilangan din nina Cristine Reyes, Rich Asuncion, Bianca King at Glaiza de Castro. Ang motto diumano ng kanilang grupo ay: “Kaaway ng isa, kaaway ng lahat!” Sayang, dahil napakabait dati ng image na ipino-project ng ex-girlfriend ni Luis Manzano, ‘tapos ngayon ay kasama siya sa grupong hindi kinatutuwaan sa showbiz, kaya baka hilahin din siya niya sa pagiging Negastar.
ChorBA!
by Melchor Bautista
