SA KAUNA-UNAHANG pagkakataon, binasag na ni Angel Locsin ang kanyang pananahimik tungkol sa break-up nila ni Phil Younghusband.
Ayon kay Angel, masasabi niyang nasa proseso na siya ng moving on dahil wala naman siyang choice kundi tanggapin ang nangyari, ipasa-Diyos ang lahat at magpatuloy sa buhay. Aminadong bukas pa rin ang komunikasyon nila ni Phil, nagkaka-text pa rin sila hanggang ngayon, pero iwas silang magkita para na rin mas madaling makapag-move on.
Klinaro rin ang iba’t ibang balita na lumabas na dahilan daw ng break-up nila ng Azkal player, una na rito ay ang usapang pera. Nakarating sa aktres ang usap-usapang ito at ayon kay Angel ay hindi nila ito napag-usapan ng ex kung kaya’t pinagtatakhan niya na may ganitong balita na lumabas.
Ang sinang-ayunan ng aktres, ang rason ng kakulangan ng oras sa isa’t isa na inakala niya nang una na adbantahe para sa kanila pero hindi pala. Bukod dito, iwas na sabihin pa ni Angel ang tunay na pinag-ugatan ng paghihiwalay nila ng ex bilang respeto sa kanilang pagiging magkarelasyon lalo’t mabait na tao ang dating kasintahan.
Nakarating din sa kanya ang pagli-link sa kanila ngayon ni Luis Manzano. Halos sabay kasi ang naging pag-amin ng tungkol sa break-up niya kay Phil at ang paghihiwalay rin ng relasyong Luis at Jennylyn Mercado. Ipinaliwanag ni Angel na ‘di sinasadya ang nagawang pag-amin. Kung maiiwasan lang ay iiwasan niya ang makipag-break lalo’t sa nakikkita namin ay nasaktan talaga nang husto si Angel sa nangyari. Mabait na tao si Luis at nirerespesto niya ito, ayaw nang dagdagan pa kung anumang hinanakit nito sa ngayon, kung saan magkaibigan pa rin sila ng ex-boyfriend pero hindi nga lang sila nag-uusap.
Sa isyu naman na nanliligaw daw si Phil kay KC Concepcion, na balitang unang naging crush noon ng Azkal player, ayaw magbigay ng komento rito ni Angel. Pero kung saka-sakaling totoo man ito, ang bilis naman, pero buhay na ito ng dalawa, labas na siya roon. Pero doon lang siya sa kung saan magiging masaya si Phil.
Sa ngayon, ang pokus ay ang pagtulong sa mga nasalantan ng bagyong Yolanda, ang kanyang career, at ang kanyang pamilya, ramdam namin ang sakit ni Angel nang sabihin nito sa amin na sagad na sagad na ang kanyang puso at sana nga ay makita na niya ang tamang tao para sa kanya. Nagbiro pa nga ang aktres na siguro ang tali-talino at ang galing-galing na niya pagkatapos ng kanyang mga naging relasyon kung ang pag-uusapan ay ang mga aral na natutuhan niya.
Magsisimula na ang seryeng Legal Wife sa Pebrero ng susunod na taon, para kay Angel ay mas maganda ito dahil nakapag-ipon na sila ng episode, kung saan nakapagbangko na sila ng isang linggo na tatakbuhin nito sa ere.
PARA KAY Sam Milby, kung totoo nga na sinabi ni Jessy Mendiola na lamang siya sa lahat ng manliligaw nito dahil gusto nito ang pagiging vocal niya sa nararamdaman niya para sa aktres, ikinatutuwa niya ito lalo’t bukas naman ang aktor na nanliligaw siya talaga kay Jessy.
Sa dami ng mga nanliligaw at nagkakagusto ngayon kay Jessy, ‘di namin kinakitaan ng kaba si Sam. Ito siguro ay dahil sa kampante ang aktor na sinsero siya sa nararamdaman niya para rito at naniniwala siya na kung sila talaga ang nakalaan sa isa’t isa ay itatakda ito ng tadhana.
Apat na taon ang nakararaan nang mauwi sa break-up ang relasyon nila ni Anne Curtis. Ngayon na lang uli nanligaw si Sam pagkatapos nito. Sa tanong namin kung bakit ngayon ay ganu’n na siya kabukas sa panliligaw niya kay Jessy, ipinaliwanag sa amin ng aktor na nagsilbing aral na sa kanya ang nangyari noon na ‘di siya umaamin agad. Pero ngayon, gusto niyang magpakatotoo sa kanyang sarili lalo’t wala namang masama kung maging sila man ni Jessy, dahil pareho naman silang malaya at walang masasagasaan.
Maiba Lang
By MELBA R. LLANERA
