MERON TALAGANG SARILING paninindigan si Angel Locsin. May nakausap akong mga taong malapit sa magandang aktres na nagpapatunay na maraming nagsasabi sa aktres na medyo dumistansiya kay Phil Younghusband.
Isa sa matinding isyu na ipinarating daw nila sa dalaga ay pinagpupustahan lang siya ng grupong Azkals. Bongga nga naman kasing maging close sa ex-girlfriend ni Luis Manzano dahil bukod sa sikat na sikat siya, pantasya talaga siya ng mga kalalakihan.
Pero merong sariling isip si Angel na hindi pupuwedeng diktahan ng ibang tao. Sa rami ng mga hayagang nagpaparating ng pagkontra sa closeness nila ni Phil, ipinaglalaban ng dalaga ang pagiging totoo sa kanya ng sikat na sikat ngayong manlalaro. Nagpapakilala raw naman sa kanya si Phil ng tunay nitong ugali. At sa pagkilatis na kanyang ginagawa sa binata, nararamdaman daw niya ang sincerity nito.
Kawawa naman si Luis dahil parang kahit ano pang pagsisikap ang gawin niya para paamuin si Angel, napunta na kay Phil ang atensiyon ng dalaga. Nasasaktan si Angel sa pang-huhusga ng marami sa sikat na manlalaro sa tunay nitong motibo ng pakikipaglapit sa bida ng teleseryeng Imortal ng ABS-CBN.
Masakit sa isang babae na sabihing siya’y pinagpupustahan lamang ng isang sikat na grupo ng mga kalalakihan. Pero ang depensa ni Angel, paniniwalaan niya si Phil kung ano ang sasabihin nito sa kanya bilang paliwanag sa mga pagdududa sa kanilang closeness ngayon.
LOVELESS SA NGAYON si Lovi Poe dahil hiwalay na sila ni Congressman Ronald Singson. Kaya may pag-asa na naman ang mga kalalakihang matagal nang nagpaparamdam sa kanya. Hindi kasi talaga sila makasingit na mapansin ng magandang young actress. Nung maging ganap na dalaga na ang anak ng yumaong FPJ, si Jolo Revilla agad ang nakaiskor sa kanyang puso, at pagkatapos nilang mag-break, pumasok na sa eksena si Mr. Singson.
Masakit din para kay Lovi ang paghihiwalay nila ni Ronald, dahil paulit-ulit din siyang nagpagod na pumunta sa Hong Kong habang kinakaharap nito ang kanyang kaso roon, hanggang sa mahatulan na itong makulong ng isang taon at kalahati. Magpapahinga muna si Lovi sa kanyang lovelife, napagod din naman daw siya sa magkasunod na kontrobersiyal niyang pakikipagrelasyon.
Kung malungkot man si Lovi nang dahil sa natapos nilang relasyon ni Ronald, ang mapaglilibangan naman niya ngayon ay ang magandang takbo ng kanyang career. Isa siya sa mga kapareha ni Richard Gutierrez sa teleseryeng Captain Barbell ng GMA-7, habang marami rin siyang nakaplanong pelikula na sisimulan.
Ang malaking tattoo ni Lovi sa kanyang likod, kapag daw nakikita niya, ang mea-ning daw ay “strong” siya. In fairness sa kanya, napapatunayan naman niya na sa dami ng kanyang mga pinagdaanan ay strong talaga ang kanyang personality, dahil nakakaya niya ang mga pagsubok na ‘yon kahit napakabata pa niya, huh!
ChorBA!
by Melchor Bautista
