HANGGANG NGAYON, dama pa rin ni Angelica Panganiban ang takot sa naranasang lindol sa Bohol. Nagkataon kasi nang mangyari ang 7.2 magnitude na lindol sa nasabing lugar, nandoon siya kasama ang barkada ng TV show na Banana Split para magtaping.
Sa pamamagitan ng kanyang Instagram account, ibinahagi ni Angelica ang hinding-hindi na niya makalilimutan nakakatakot na karanasan at pasasalamat sa mga taong nagbigay sa kanila ng tubig at pagkain.
“Naghanap kami ng mataas na lugar papunta sa city hall ng Tagbilaran. Nakatakbo kami ni Pooh ng 7 kms away sa location ng less than 40 mins. Kumalma na lang kami sa city hall nu’ng kumpleto na kami.
“Maraming salamat sa nagdasal para tumigil ang kalamidad. Sa mga nagpadala ng pagkain. Bumili ng inumin. Sa sinakyan naming tryc. Sa mga batang umiiyak… sana natahan na kayo dahil nakasama ninyo na pamilya ninyo.
“Mabuhay ang katatagan nating mga Pilipino.Tulung-tulong tayo ‘Pinas. Magdasal tayong lahat. At the end of the day, kaya pa rin nating ngumiti sa lahat ng ‘to. Kinaya kong makauwi at makasama ang mga mahal ko, sa kaiisip ng mga bagay na masasaya. Nag-work siya sa akin.”
HINDI NAMAN apektado si Mikael Daez sa isyu ng itinanggi siya ni Miss World Megan Young bilang boyfriend.
Sa taping ng Bubble Gang sa studio 7 ng GMA, cool at nakangiti lang si Mikael nang makatsikahan namin.
Klinaro rin niya na hindi siya umiiwas magpa-interview about their relationship ni Megan. Katuwiran ni Mikael, wala naman silang inamin in public na sila na ni Megan kaya walang dapat isagot sa nasabing isyu.
Importante ay nagkakaintindihan sila ni Megan at nagkakasundo sa mga bagay-bagay. Wala naman daw ipinagbago sa kanila ni Megan noon at hanggang ngayon ay ganoon pa rin sila nagkakaintindihan.
Kahit na raw gaano ka-hectic ng schedule ni Megan, nagkakaroon pa rin sila ng pagkakataong magkita. At masaya siya sa mga tao behind Miss World na very professional daw lahat.
Katuwiran pa ni Mikael, hindi naman daw yata maganda na ipagsigawan o ipagyabang pa niya na ang girlfriend niya ay isang Miss World, although never naman niyang inamin in public na sila na nga.
Kung busy si Megan, super busy rin si Mikael dahil sa sunud-sunod na project na ginagawa sa GMA-7. Kasama pa siya sa upcoming na teleserye na Adarna na tatlo silang lead actor.
Ang totoo, wala na siya sa pangangalaga ng Mercator ni Jonas Gapud. Bale booking agent na lang daw ang Mercator sa mga modeling stint at si Bechay Vidanes na ang kanyang manager sa showbiz.
MATAGAL DING napahinga si Rhian Ramos sa paggawa ng teleserye, huli siyang napanood sa Indio at nagpahinga muna siya pagkatapos.
“Napagod din kasi ako doing Indio. Bukod kasi sa costume that I have to wear sa taping, naging everyday ang taping because we were working around the schedule of Senator Bong Revilla. Kung kailan siya puwede, du’n kami nagti-taping. Nataon na kailangang araw-araw para may maibangko kami. May week kasi na wala kaming taping because he was so busy. Kaya when it ended last May, I went on a vacation. We started taping for Genesis noong last week of August na. Kaya matagal din akong nakapahinga.”
Second team-up na nila ni Dingdong Dantes after Stairway To Heaven in 2009. Dapat ay magkasama sila sa My Beloved pero pinalitan siya ni Marian Rivera.
“It’s been four years at wala namang nabago kay Dong (tawag niya kay Dingdong Dantes). He’s still very good and very handsome! Mas mature na ang role namin, kasi this time nanay na ako. First time ko to play a mother kaya ibang-iba itong Genesis sa akin.”
Samantalang about her lovelife, okey naman daw ang relasyon nila ni KC Montero at walang kaproble-problema.
Oh. C’mon!
By Gerry Ocampo
