IKINAGULAT NI ANGELICA Panganiban ang regalong ibinigay sa kanya ni Derek Ramsay na 2.5 carat each diamond earrings para sa kanilang fourth year anniversary bilang mag-dyowa. Natulala ang dalaga, hindi agad nakapagsalita nang buksan nito ang special gift na bigay sa kanya ng aktor. Na-shock siyempre si Angelica sa mamahaling regalong tinanggap niya mula sa nobyo.
Ibang klaseng mag-alaga ng girlfriend itong si Derek kaya naman ganoon na lang ang pagmamahal na ibinibigay sa kanya ni Angelica. Gusto lang ng aktor na mapasaya ang kanyang minamahal kaya nag-effort itong regaluhan ng mamahaling hikaw ang nobya. Isang romantic dinner lang ang request ni Angel para sa kanilang dalawa.
Saksi kami kung papaano asikasuhin ni Angel si Derek tuwing may game ito. Ang dalaga mismo ang bumibili ng pagkain at inumin para sa kanila at kaibigan. Wala ring paki ang aktres na pinanonood ng mga tao sa paligid ang pagliligpit ng kanilang kalat bago umalis. Parang mag-asawa na nga kung magturingan sa isa’t isa ang mag-dyowa.
Kahit sa kabila ng mga intrigang kinasasangkutan ni Angelica, lalong tumibay ang pagmamahal ni Derek sa kasintahan. Lahat yata ay gagawin niya para protektahan ang babaeng nalalapit nang iharap sa dambana.
MASAYANG IBINALITA NI Fanny Serrano ang trip nila nina Sharon Cuneta at Ai Ai delas Alas sa Europe for a show. “Super successful ang aming greet and meet the fans dinner affair sa Swissotel, Zurich. Umaapaw sa dami ng tao at napaka-formal ang kanilang attire as in naka-long-gown pa ‘yung iba. Nakatutuwa talaga ang mga Pinoy sa Zurich. Ramdam mo ang excitement nilang makita, makasabay kumain at makausap si Sharon,” kuwento ni TF na talagang nag-enjoy sa biyahe nila ng Megastar.
Ibang klase nga raw si Sharon sa pakikitungo sa kanyang mga fans, lahat ng nadu’n ay nagpakuha kasama ang kanilang idolo. “May mga umiyak pa nga sa tuwa dahil hindi nila inaasahan na napaka-sweet at game ni Mega. Nakipagtsikahan sa kanila nang mahabang oras kaya super tuwa ang producer namin sa Europe na sina Chato at ang asawa niyang Swiss na si Hugo Risi. Sold out ang buong show namin sa Zurich and Monacco,” dugtong pa niya.
September 18, hindi raw puwedeng magsalita si Sharon in preparation for her voice kaya nagikut-ikot muna sila sa downtown na napaka-sarap ng weather. “Blockbuster ang show namin sa Zurich, grabe sa ganda ang reaction ng audience kay Sharon and Ai Ai, kasi first time nilang dalawa du’n. Riot ang duet nila sa hit songs medley na ‘Tukso’ at ‘Isang Linggong Pag-ibig’. Pagkatapos ng duet nila ni Mega, nagsolo naman si Ai Ai ng ‘Aegis Medley’, palakpakan ang mga tao,” pagmamalaking tsika pa ni Fanny.
After Zurich, fly naman sila sa Monacco for a show. Seven hours pala ang biyahe going to Monacco kaya sleep muna sila ni Mega para raw may lakas for the next show. “Sa opening number ni Sharon na ‘Kahapon Lamang’, super sigawan, tilian ang audience ng marinig ang boses niya. Halos lahat ng tao may dalang kamera. Sinundan ng ‘Kahit Maputi Na Ang Buhok Ko’ then teens medley classics na ‘Mr. DJ’ with Louie Ocampo na modern touch medley ng ‘Kahit Konting Pagtingin’, ‘Barry Manilow’, ‘Hagkan’, ‘To Love Again’… the Louie Ocampo medley of ‘Maging Sino Ka Man’, ‘Pangarap Na Bituin’, ‘Bituing Walang Ningning’ and her finale song na ‘Sana’y Wala Nang Wakas’. Isang memorable experience ang biyahe naming ito nina Mega at Ai Ai,” sambit pa ni Fanny na super hectic din ang schedule.
Ang Philippine International Cosmetologists Association ni Fanny Serrano ay magkakaroon ng Regional Competition sa Davao City, October 6; Nueva Ecija, October 13; Bacolod City, October 16; Bicol, October 20; and Davao City, October 27. Asahan ninyo ang pagdalo ng beauty icon na si Fanny sa nalalapit na competition.
AYAW Paawat!
by Eddie Littlefield
