SPECIAL GUEST NAMIN sa Startalk nu’ng kamakalawa si Pia Magalona kasama ang dalawang anak niyang sina Maxene at Saab Magalona dahil ginunita nu’ng araw na ‘yun ang 1st death anniversary ni Francis Magalona.
Mayroon ding inihanda ang Eat… Bulaga!, kung saan kumanta si Maxene kasama ang iba pa niyang kapatid na sina Elmo at Arkin.
Doon pa lang sa studio ng Bulaga! ikinukuwento na ni Pia at nina Maxene na nagpaparamdam palang madalas sa kanila si Francis.
Nu’ng gabi ng Biyernes pa lang, pumunta na raw sila sa Loyola Memorial Park para magdasal doon at kasama nga nila doon ang iba pang kaibigan gaya nitong sinusuportahang grupo ni Francis na Gloc9.
Nagkukuhaan daw sila ng picture doon at nagulat sila, meron silang kuhang may apat na figures na nakatayo sa isang lugar na wala namang katao-tao.
Tingin nila parang si Francis ‘yung isa na naka-shorts at malakas ang pakiramdam nilang sinamahan sila doon ng Master Rapper.
Ipinakita ito sa amin ni Pia pagdating nila sa Startalk at meron pa silang isang litratong kuha na tingin nila kasama pa ni Francis ang dalawang aso niyang namatay rin pagkatapos nitong pumanaw.
Sa interview namin kay Saab, ikinuwento rin nito na nagparamdam din ang Papa nito nang magpa-auditon daw siya sa MTV.
Nang isinalang na raw ito, biglang pumutok daw ang mga klieg lights kaya nagkabit na naman daw sila ng bagong ilaw, pero nang ibinalik uli si Saab, pumutok na naman daw ito. Kaya feeling daw niya, ayaw ng Papa niya na sumali sa MTV.
Kung magparamdam daw ito, laging nasa ilaw raw ito kaya naniniwala raw sila na si Francis talaga ‘yun.
Ipinaliwanag na rin pala ni Pia na kaya hindi pa ito pumapayag na i-release ang album na collaboration nina Ely Buendia at Francis dahil gusto nitong mapaghandaan nang husto ang album na ‘yun gaya nang paglabas ng mga pictures ni Francis na itinatago ni Pia.
Hindi pa raw kasi niya kayang ayusin ang mga pictures na ‘yun kaya hindi naman daw siya nagmamadali. Sa tamang panahon daw ay maaayos din daw at puwede nang i-release ang album na ‘yun. Siyempre, ayaw naman ni Pia na basta-basta i-release lang ‘yun, dahil gusto nitong mapaghandaan nang husto.
KUWENTO NG IBANG staff namin na nag-cover ng kasal nina Camille Prats at Anthony Linsangan, naloka raw sila sa ayos ni Angelica Panganiban na kasali sa entourage ng kasal na ‘yun.
Naka-gown daw kasi si Angelica, pero naka-rubber shoes. Ano ‘yun?
Tapos, hindi pa raw nakaayos ang buhok at parang siya lang daw ang nag-ayos ng mukha niya.
Parang hindi raw okay ang hitsura ni Angelica sa kasalang ‘yun na hindi nila alam kung lasing o bangag!
Hindi naman namin madalas na nakikita iyan, pero hindi naman daw ganu’n ang ayos niya kapag nakikita siya sa TV.
Tinanong nga raw ito ng isang reporter doon kung bakit naka-rubber shoes ito. Ang sagot daw niya, hindi raw siya kasi puwedeng mag-heels dahil maliit daw ang ka-partner niya sa entourage na ‘yun.
Parang hindi naman yata tama. Tuloy ang duda namin, baka hindi naman totoong okay na sila ni Derek Ramsay kahit sinasabi naman nilang nagkabalikan sila at nagkaayos na raw.
Ewan ko na lang. Tingnan na lang natin!
Mga Mata ni Lolita
by Lolit Solis
