GALIT NA GALIT si Annabelle Rama nang makausap ng Pinoy Parazzi kahapon nang umaga sa QCRTC, kung saan sinabi nitong hindi siya natatakot sa demandang inihain sa kanya ni Nadia Montenegro. Dalawa ang kasong isinampa ni Nadia laban ka Annabelle at ito ay Child Abuse at ang mga Libelo.
Masyado raw nakakasirang puri ang mga binitiwang linya ni Annabelle sa Twitter account nito. “Bakit totoo naman ang lahat ang mga sinabi ko. Totoo namang marami siyang lalaki, ‘di ba? Tsaka, ‘Dong, tigilan niya ako dahil hindi ako ang nakiusap sa kanya na i-manage ko ang mga anak niya. Siya ang nakiusap sa akin, tapos ganito ang gagawin niya?”
Hindi raw natatakot si Annabelle sa demanda ni Nadia. “Ang katakutan niya ay ang galit ko, ‘Dong, dahil kilala ko ang pagkatao niya, at alam ko kung ano ang baho niya. Huwag siyang magmalinis sa akin dahil hindi ko siya uurungan at kahit anong laban pa, sige payag ako kung gusto niyang magsampalan pa kami at magsabunutan dahil hindi ko siya uurungan.”
Ayon kay Annabelle, hindi raw siya ang dapat na idemanda ng Child Abuse, dahil kung meron mang dapat idemanda ay si Nadia iyon. “Siya ang dapat na idemanda ng kanyang mga anak dahil hindi siya naging mabuting ina. Pabaya siya at hindi siya marunong magpaka-ina. ‘Yan lang ang masasabi ko sa kanya kaya tigil-tigilan ako ng babaeng iyon.”
Tinanong ng Pinoy Parazzi kung ang sinasabing baho ni Annabelle ay ang “baho” na unang pinaputok noon ni Cristy Fermin kaugnay sa diumano ay pagkakaroon ng ugnayan ni Baron Geisler kay Nadia. “Mas matindi pa du’n ang hawak kong baho at may ebidensiya ako. Kaya kung ako sa kanya, tigil-tigilan niya ako dahil hindi ko siya uurungan.”
Tanging mensahe ni Tita Annabelle kay Nadia: “Kung ako sa ‘yo, ‘Day, pag-isipan mong mabuti ang iyong ginagawa dahil bandang huli, sa iyo lahat babalik ang mga sinasabi mo. Kilala mo akong magalit at hindi ako natatakot sa isang tulad mo lang,” pagwawakas ng ma-taray na ina.
NAGKAGULO ANG MARAMING media sa Parañaque Municipal Trial Court kahapon ng hapon. First hearing kasi iyon para sa kontrobersiyal na kaso ni Ramgen Revilla kaugnay sa pagpaslang dito na ang sinasabing ang salarin ay ang mga sariling kapatid na sina Ramon Joseph Bautista at si Mara Ramona Bautista.
Nakausap natin ang kanyang lola na si Mommy Lyn, ina ni Genelyn Magsaysay, at sinabi nitong napaka-unfair para sa kanilang pamilya ang nangyayari. “Hindi kriminal si RJ, napakabait ng batang iyan. Bakit nila ipinakulong? Hindi ako naniniwalang kayang ipapatay ni RJ ang kanyang kapatid, alam kong inosente siya.”
Ayon kay Mommy Lyn, hindi rin daw siya kumbinsido na may malaking kinalaman si Mara sa nangyaring pagpaslang kay Ram. “Hindi puwedeng gawin iyon ng aking mga apo. Totoong kung minsan ay nagkakapikunan sila, pero parte lang iyon ng buhay ng magkakapatid.”
May pakiusap si Mommy Lyn sa kanyang apo na si Ramona. “Ramona, anak, bumalik ka na rito sa Pilipinas at harapin mo ‘yung akusasyon, laban sa iyo para malinis ang pangalan mo. Huwag mong hayaang mabahiran ng dumi ang maganda mong pangalan,” umiiyak pang sabi nito.
WALA PANG NAGAGANAP na birthday party kay Vilma Santos dahil hanggang sa mga sandaling ito, ang Star for All Seasons ay nasa ibang bansa pa kasama ang asawang si Ralph Recto. “Medyo namahinga si Vi, kasi masyado siyang napagod at babalik siya next week. Hindi ko lang alam, Morly, kung balak niyang magkaroon ng party.” Pahayag ni Ate Emily Santos.
Ayon kay Ate Emily, sinamantala ni Ate Vi ang kanyang bakasyon dahil sa mga susunod na buwan ay magiging masyadong abala ang Star for All Seasons dahil sisimulan na nito ang project na pagsasamahan nila ni Kim Chiu.
“Hindi ko alam kung ano ang plano ni Ate Vi sa kanyang pagbabalik, pero for sure, uunahin niya ang trabaho niya sa Batangas.”
Sa kabilang banda, usap-usapan na posibleng maulit ang pelikulang T-Bird at Ako nina Vilma at Nora Aunor under Regal Films. Balak kasi ni Mother Lily Monteverde na pagsamahin ang dalawang higanteng aktres ng bansa sa isang pelikula. Tsuk!
More Luck
by Morly Alinio
