TALAGANG DAPAT na paghandaan ni Tita Annabelle Rama ang mga hakbang na kanyang gagawin kontra kay Nadia Montenegro na ngayon ay humantong na sa demandahan, at nagsanga-sanga na ang isyu tungkol sa kanilang naging alitan, dahil ang dami-dami na nilang pagbabatuhan ng mga salita na ipinupukol sa isa’t isa. Ang buong showbiz ay nag-aabang kung hanggang saan makararating ang banggaan nina Annabelle at Nadia.
Parang sa pagkakataon daw na ito ay nakatagpo si Tita Annabelle ng kanyang katapat. Palaban daw masyado kasi ngayon si Nadia, at kung ang mommy raw ni Ruffa Gutierrez ay maraming pagtataray na ginagawa laban sa dating aktres, mayroon din daw nakatakdang pasabugin si Nadia laban sa wife ni Tito Eddie Gutierrez, at ito ay tumutukoy sa pera o malaking pagkakautang diumano na si Rama ang sangkot sa isyu, kaya dapat daw pakaabangan kung itutuloy ni Montenegro ang malaki niyang panggulat.
Parehong may kakaibang istilo ng pakikisama sina Tita Annabelle at Nadia sa mga taong nakakasalamuha nila sa showbiz. Kailangang daanin ni Tita Annabelle sa pakiramdam kung totoo sa kanya ang mga taong nakakaharap at nakakausap niya. Mayroon din daw kasing mga tao sa showbiz na mga galit sa Mommy ni Richard Gutierrez, na kay Nadia naman kumakampi ngayon, kaya raw si Nadia ay parang lalong nagkakaroon ng lakas ng loob na banggain ang kontrobersiyal na talent manager.
BLIND ITEM: Nakawiwindang ang tsismis na ito na nagsimulang sumingaw sa umpukan ng mga manunulat sa showbiz. Pinagkukuwentuhan kasi nila kung kumusta na kaya at nasaan na ang mga sumikat na aktor noon, na ngayon ay mga hindi na aktibo, pero pupuwede pa naman daw bumalik sa limelight, dahil kahit may edad na sila ay mga guwapo pa rin sila. Nabanggit ang isang dating matinee idol na nagkaroon din ng Playboy image. Itago natin siya sa pangalang Vhenee Romero.
“Nasaan na ba ngayon si Vhenee? Napakaguwapo pa rin niya. Kahit tatay o lolo sa mga teleserye ay pupuwede siya. Napakaguwapo kaya niya nu’ng kanyang kasikatan. ‘Kita n’yo naman, mga sikat at pagkagagandang aktres ang kanyang mga nakarelasyon,” tanong ng isang beteranang manunulat.
“Sumikat naman siyang talaga. Kaya siguro hindi na niya feel na magbalik-showbiz. Nakakapanghinayang nga, ‘di ba? Ang balita ko ay namamalagi na lang siya sa kanyang probinsiya, dahil may mga lupain sila roon, tsaka naroon ang kanyang mga kaanak. Kaya lang, hindi maganda ang huli kong nabalita tungkol sa kanya,” wika ng isa pang beteranang manunulat na kaibigan ng dating matinee idol.
“Ano’ng balita ‘yon?” tanungan naming lahat.
“Susmaryosep! Ang huli kong balita, na nanggaling sa kanilang probinsiya at sa kalapit probinsiya pa nila, na si Vhenee Romero daw ay humahada na. Nanlalalaki na. Kumokopas na ng ka-notahan. Ganu’n daw ‘yon, eh. Kapag ang isang lalaki na naging babaero, kapag daw nagkakaedad na ay medyo lumalamya ang mga kilos at nagiging bading. Lalaki na rin ang gusto,” dugtong pa ng beteranang writer.
Talagang sumikat si Vhenee Romero, kaya mag-iingat tayo ng pagkikilanlan na dapat n’yong hulaan. Naging parte ng kanyang lovelife ang isang beteranang aktres, nakarelasyon ang isang aktres na hanggang ngayon ay sikat na sikat pa rin, at naka-live in ang isang dating napakaganda, flawless at boobsie na sexy actress. Hanggang d’yan na lang po ang pahulaan.
ChorBA!
by Melchor Bautista
