MAINIT PA RING pinag-uusapan ngayon ang paghihiwalay nila Angel Locsin at Luis Manzano.
Bulong-bulungan sa mga tabi-tabi kung ano nga ba talaga ang tunay na dahilan nang pinag-awayan at hiwalayan ng dalawa. Kilalang best friend ni Luis si Anne Curtis at sa presscon ng huli para sa Fern Slim at Pre-farewell party ng The Wedding, nakausap ng inyong lingkod si Anne at tinanong siya tungkol sa pakikipaghiwalay ng kanyang bestfriend.
“I’m really in no position to really comment about it. You know whatever it is, I know they will be able to handle it in such a way na kung ano man ‘yung problema nila, kung meron man. I hope they’re able to fix it.” sagot ni Anne.
Pero aminado siyang nakausap na niya si Manzano tungkol sa isyung ito. Pero halatang pigil na pigil at maingat si Anne sa pagbibigay ng komento. Ayaw niyang sa kanya pa manggaling ang mga detalye ng paghihiwalay. Sa pagpipilit ng mga reporters, tinanong ulit siya kung bakit naghiwalay sina Luis at Angel, ayon na rin sa kuwento ni Luis.
“I really can’t. I’m in no position to comment at all.
Yes, I see him in ASAP and all, pero hanggang doon lang.” aniya.
Excited naman si Anne sa huling dalawang linggo ng The Wedding. Malalaman na ng publiko kung kanino mauuwi si Candice, ang karakter ni Anne sa teleserye. Kay Zanjoe ba o kay Derek? Hindi mapaglagyan ng tuwa si Anne dahil halos dalawang taon na daw nilang binuo ang teleseryeng ito at dahil nga sa magulo at ‘di magtagpo-tagpong schedule ng mga artista, ngayon lang daw nila natapos ang pagte-taping.
Kung excited na si Anne sa pagtatapos ng The Wedding, excited na rin siyang makita at mapanood ang In My Life, ang pelikula nila Luis, John Lloyd at Ms. Vilma Santos. Ito na raw ang pagkakataon na maipakita ng kanyang best friend na si Luis ang acting prowess nito at hindi lang pagpapatawa o light hosting ang kaya nitong gawin. Pero sinabi na ni Anne na hindi siya makakarating sa premiere night ng pelikula dahil may gagawin na itong ibang bagay.
“Yung premiere yata nila, wala ako rito. Kaya sad ako. Kaya sinasabi ko na talaga kay Manzano (Luis) na before pa, I think this is important for Manzano and his acting career, kasi we know him as a host, a funny actor, very light romantic kind of guy. I really want to see his side of being an actor and of course, kasama pa nila si Vilma Santos, kaya it’s really something to look forward to.” pahayag ni Anne.
Inaabangan na rin niya ang controversial na kissing scene nila John Lloyd at Luis. Ano ba ang tingin niya dito?
“Honestly, I think it’s a piece of art. People kasi might criticize but the thing is, but hey, the perfect example is Sean Penn for Milk. Hands down ako kay (Luis) Manzano saka kay JL (john Lloyd) for having the courage to take it on. Actors talaga sila.” pagtatapos ni Anne.
