NANG ISULAT NAMIN dito sa Pinoy Parazzi ang hindi pagsipot ni Bea Alonzo sa premiere night ng kanyang pelikulang Miss You Like Crazy with John Lloyd Cruz sa Alex theater, California, agad naman binigyang-linaw ng dalaga sa SNN ang tungkol sa issue.
Ipinaliwanag ni Bea na hindi raw sila agad nakakuha ng working visa para maka-attend sa nasabing event. Hindi sila nakahabol sa dapat sana’y schedule nila sa US. Ganoon na lang ang paghingi ng paumanhin ni Bea sa kanyang mga fans sa Amerika na pumila at bumili ng ticket para lang makita’t makasama nila ang kanilang idolo. Maging ang Star Magic management ay naglabas na rin ng statement tungkol dito.
Nangako naman si Bea sa mga fans nila ni John Lloyd na babawi siya sa susunod na pagpunta nila sa US. Sa pagbisita raw niya roon, hindi lang autograph signing ang gagawin niya. May picture taking pa kasama ang kanyang mga fans!
Ramdam namin ang sinseridad ni Bea sa mga binitawang niyang salita sa SNN. Very apologetic ang dalaga sa mga fans. Nandu’n ang panghihinayang ng magaling na actress na hindi siya nakarating. Bigo siyang hindi nakapiling ang mga ito. ‘Yung iba pa nga raw fans nagbiyahe pa para lang makita siya nang personal.
Well, abangan na lang natin ang susunod na pelikula ni Bea with Lorna Tolentino under Star Cinema plus teleserye with Gretchen Barretto and Derek Ramsay sa ABS-CBN. I’m sure, this time hindi na bibiguin ni Bea ang kanyang mga fans!
ISANG MASAYANG JOLO Revilla ang nakaharap namin sa get-together party sa Imperial Palace na bigay ni Lily Monteverde para kina Bong Revilla at Lani Mercado. Natutuwa kami kay Jolo dahil totoong naka-move-on na siya pagkatapos ng relasyon nila ni Lovi Poe. Tanggap na niyang hindi sila para sa isa’t isa kaya minabuting tapusin na ang ugnayan nilang dalawa.
“Wala na kaming communication, no text, no phone call, wala na kami! Tapos na ‘yung sa aming dalawa, tahimik na ako ngayon. Huwag na lang natin siyang pag-usapan dahil wala nang dapat pag-usapan pa!” Pakiusap ni Jolo sa amin.
Wala na nga pakialam si Jolo kung mag-dyowa na sina Lovi at Ronald Singson. Minabuti naming huwag nang kulitin ang binata tungkol sa dalaga. Naka-focus ngayon ang young action star sa kanyang career at pamilya. Naging successful ang action-adventure niyang Pepeng Agimat na talaga namang kinagiliwan ng masang Pinoy at pumalo sa taas ng rating.
Nakatakdang gawin ni Jolo sa Kapamilya network ang “Kapitan Inggo,” na naging blockbuster film ni Ramon Revilla, Sr. This time, panibagong pakikibaka ang haharapin ng ating young action star.
AYAW Paawat!
by Eddie Littlefield
