MARAMING ARTISTA sa showbiz ang pupuwedeng bansagan ng titulong “Taray Queen” pero ang iba naman sa kanila ay nakikisakay lang sa nasabing titulo para mapansin sa showbiz. Ilan lang sa kanila ang nagtataglay ng tunay na katangian para sa nasabing titulo, katulad na lamang ng beteranang aktres na itago natin sa pangalang Farida Anson. Kapag siya ang nagtaray at nagsalita ng mga katagang lumalatay, ay wala kang magagawa kundi ngumanga sa sindak at paghanga.
Napakayaman na ni Farida, dahil kilala ang kanilang angkan sa pagiging masinop sa pera at mahiligin sa pagnenegosyo. Mayroon siyang naglalakihan at magagandang bahay sa mga subdibisyon sa buong Pilipinas. Hindi nakapagtataka na yumaman si Farida, dahil sumikat siyang artista at naging movie producer din siya. Magaling siyang aktres, kaya marami ang gustong bumalik siya sa showbiz. Nang tanungin nga siya, papaano kung operan siya ng isang TV station na lumabas sa isa sa kanilang mga teleserye. Ang sagot daw ng beteranang aktres: “Hindi ko na kailangan ‘yan. Mayaman na ako para patulan ang offer na ‘yan!”
Kamakailan naman sa isang malaking okasyon sa showbiz ay nagkatipun-tipon ang mga sikat na artista, at dumalo rin doon ang mga kasabayang artista ni Farida sa isang sikat pero nagsarado nang movie company. Habang nasa kainitan ang party ay dumating ang isang kontrobersiyal ngayong beterana ring aktres na kilala sa katarayan na si Rina Amoyo. Sabi ng mga naroong kakilala ni Farida: “Hayan na ang isa sa mga kasabay mo sa showbiz.” Ang litanya raw ni Farida: “Excuse me, pero hindi namin siya ka-level. Starlet lang siya noon!”.
(By Melchor Buatista)
