WALANG CELEBRATION DAW na nangyari kaugnay ng birthday ni Bianca Gonzales nitong March 11. Nataon kasi na sa mismong araw pa ng kanyang kapanganakan niyanig ng malakas na lindol ang Japan na sinundan pa ng sobrang mapaminsalang tsunami.
“Buong araw nasa bahay lang ako,” sabi ng dalaga sa amin nang mapasyal kami sa live airing ng SNN recently. “I ate lang ng lunch with my Mom. And then, nanood lang ako ng CNN news buong araw.”
Kumusta sila ng nali-link sa kanya ngayon na si JP Intal, ang ex-boyfriend ni Carla Abellana?
“Ah, we had lunch together with my Mom sa mall lang, kasama siya. We had lunch lang tapos umuwi na ako ng bahay. Ako kasi kapag birthday ko, eversince dati, hindi ako nagpapa-party o nagpapa-event. Gano’n. Gusto ko lang talaga, I spent it with my family.”
Ano ang birthday gift sa kanya ni JP?
“Surprise!” nangiting sambit ni Bianca. “Basta he gave me something nice for my room lang,” aniya pa na hindi na ini-specify kung ano ‘yong regalong ibinigay sa kanya ng nasabing guy.
So, steady na ba sila o nasa dramang getting to know each other stage pa rin?
“Gano’n pa rin. Hindi talaga, totoo na kami na.”
Hindi ba siya kinukulit nito?
“Hindi ako nagpapakulit! Oo. Hahaha! ‘Yun ‘yon.”
Na-interview niya kamakailan for SNN ang kaibigan niyang si Mariel Rodriguez at ang napangasawa nito na si Robin Padilla. Hindi ba siya parang naiinggit sa happiness na pinagsasaluhan ngayon ng dalawa as husband and wife para maisip na it’s about time na magkaroon ulit siya ng lovelife?
“Hindi ako naiinggit. I’m happy for them. At saka, katulad nu’ng kay Mariel, parang dumating lang, eh. So alam ko, darating din lang ‘yon sa akin. Si Mariel, hindi naman niya ini-expect na darating si Robin sa buhay niya. So alam kong kung nakatakda ‘yon, darating talaga.”
Maaaring dumating na nga ito sa kanya sa katauhan ni JP, kaya lang, siguro’y kinikilatis muna niyang mabuti kaya hindi pa niya sinasagot. Obviously naman, ito ang pinaka-close na guy sa kanya ngayon na madalas din nga niyang nakakasama.
O, puwede ring gaya ng ibang showbiz couple, nagkakamabutihan na nga sila kaya lang ay hindi pa sila handang umamim. ‘Yun na!
SA IKALAWANG PAGKAKATAON, muling naghiwalay bilang ma-nager at talent sina Ronnie Liang at ang discoverer at mentor niyang si George Rocha. Kung sa una, walang gaanong isyu, itong pangalawa ay tadtad ng intriga. Unang-una na raw na naging problema ay ang usapin tungkol sa pera.
Nadiskubre umano ni Ronnie na hinohokus-pokus ng kanyang ma-nager ang kanyang finances. Gaya halimbawa sa mga shows, humi-hingi siya ng kopya ng mga kontrata, wala naman daw ipinapakita sa kanya si George. Wala rin daw nga itong maibigay na voucher tungkol sa mga nagiging TF niya.
Pero ang pinakamasaklap daw, nang lumala na ang hindi pagkakaunawaan sa pagitan nila nang malaman ng kanyang manager na may girlfriend siya, umabot sa puntong mismong ito raw ang naninira sa kanya gaya ng naunang banta na nito sa kanya. Lalo raw ngayon na nasa poder na si Ronnie ng bagong manager niyang si Noel Ferrer.
Kung bakit nagagawa ito ng ma-nager niya sa kanya, siguro umano’y dahil na-obsessed ito sa kanya. Gano’n pa man, handa umanong harapin ni Ronnie ang kung anupamang mga gulong mangyayari kaugnay ng sigalot sa pagitan nila ng dati niyang manager.
Kapansin-pansin ang biglang pagpayat ni Ronnie. Pero hindi raw ito dahil sa gulo sa pagitan nila ngayon ni George. Talaga raw nag-diet siya. Na mukhang napasobra dahil mukha na siyang maysakit.
Hindi na raw niya hahabulin pa ‘yung mga perang dapat ay makukuha pa sana niya sa kanyang former manager. Kaya pa naman daw niyang kitain pa ulit iyon. Ang mas importante umano ay nakakawala na siya rito. Kung magpatuloy man daw ito ng paninira sa kanya, hindi na raw siya apektado pa. Basta nasabi umano niya ang kanyang panig na pinaninindigan niyang siyang totoong kuwento sa isyu sa kanila ni George. Ganyan?
Rubbing Elbows
by Ruben Marasigan
