NAGPAPATULOY SI Coco Martin sa kanyang paninindigan sa buhay na bago niya isipin ang personal niyang kaligayahan ay uunahin muna niyang isaayos ang para sa kanyang pamilay at mga mahal sa buhay.
Hanggang ngayon kasi ay puro trabaho pa rin ang tinututukan ng magaling na actor. Kaya nga hindi nakapagtatakang napakabango ng kanyang pangalan sa bakuran ng ABS-CBN. Dahil kahit sumikat na siya ay wala pa rin siyang kaere-ere, kaya mahal na mahal siya ng kanyang mga nakakasama sa trabaho.
Sa isang panayam nga namin sa kilalang manghuhula sa showbiz na si Madam Rosa, sinabi niyang magpapatuloy pa talaga ang kasikatan ni Coco, dahil sa pagmamahal nito sa kanyang trabaho.
Nagpapatuloy nga ang suwerte ni Coco, dahil kung sa kanyang mga pelikula at mga teleserye ay nakasama na niya ang mga sikat na artista na sumuporta lang sa kanya, ngayon naman bilang mga bida ay kasama na niya ang Superstar na si Nora Aunor sa pelikulang Padre De Familia ni Direk Adolf Alix, Jr.
Sobrang nabilisan din si Coco na dumating kaagad ang magandang pagkakataon na magkasama sila ni Nora sa pelikula.
“Umalis kasi siya sa bansa, kaya akala ko dati ay hindi ito mangyayari. ‘Yung kahit hindi kami talaga magkasama sa eksena, basta makasama siya sa movie ay okey na sana. Pero heto, suwerteng magkasama talaga kami. Kuwento ni Ate Guy, ang pagkakapareho daw namin ay nanggaling kami sa simpleng buhay, na totoo naman.”
ChorBA!
by Melchor Bautista
