Habang nagdi-deadline ako, kasalukuyang pinapanood natin ang Ms. Universe 2010 na isa sa pinakapaborito ay ang pambato nating si Maria Venus Raj.
Ang saya-saya pa naman ng mood nating lahat dahil lumaban naman si Venus kahit hindi nito nakuha ang korona, pasok naman sa top 5. Happy na tayo riyan. Kahit papa’no, matakpan ng kaunti ang kahihiyang inabot natin sa naganap na hostage-taking nu’ng kamakalawa lang.
Mga turista rito galing Hong Kong ang nabiktima sa hostage-taking na hindi maganda ang kinahinatnan, kaya nakakahiya na naman tayo!
Hay naku! Isa pa naman sa pinakapaborito kong bakasyunan ang Hong Kong, pagkatapos heto’t isusumpa na naman tayo ng mga Chinese at pati na rin sa ibang bansa.
Unti-unti pa namang gumaganda ang takbo ng turismo natin, tapos heto na naman ang bumabandera sa atin. Lalo tuloy tayong katatakutang puntahan. ‘Di ba naglabas na nga ng travel advisory ang Hong Kong at pati na rin ang ibang bansa ay may travel alert laban sa atin. Nakakaloka!
Anyway, maganda ang feedback kay Venus at lagi siyang nangunguna sa internet polling at hindi lang mga Pinoy, kundi pati ibang bansa ay pumupusta kay Venus na magwawagi sa Ms. Universe. Pero hanggang fourth runner-up lang ang nagetlak niya, okay na iyan!
Nalungkot lang ito nang nabalitaan niya ang nangyari sa kapwa Bicolana niyang si Melody Gersbach, kaya iaalay rin daw niya kay Melody ang laban niyang ito.
Nagkuwento nga ang kapwa niya beauty queen na si Nicolete Henson na sumama sa kanya sa Las Vegas na umiyak daw ito nang nalaman niya ang malagim na nangyari kay Melody. Isa kasi ito sa tumulong sa kanya sa paghahanda niya sa laban niya sa Ms. Universe.
Dadalhin na pala rito ang mga labi ni Melody dahil ililibing ito sa Angeles City. Sana maabutan pa ito ni Venus kung makauwi agad siya rito.
ANO NAMAN ITONG narinig kong kuwentong parang nabastos daw ni Zanjoe Marudo si Cristine Reyes sa taping ng teleserye na ginagawa nila?
Ang kuwento sa akin ng mga taga-Tweetbiz, aksidenteng nadulas daw si Cristine sa taping nila na kaagad namang nasalo ito ni Zanjoe. Pero ‘yung pagkasalo sa kanya, sa dibdib daw niya ito nahawakan. Hindi naman ito nabigyan ng malisya ni Cristine dahil mabuti nga at nasalo siya, pero ang ikinaiirita raw nito, nag-tweet daw itong si Zanjoe sa isang kaibigang direktor na parang tuwang-tuwang nahawakan niya ang mga malulusog na dibdib ni Cristine.
Siyempre nabasa ito ng seksing aktres dahil napa-follow naman sila. Kaya nagalit si Cristine at nag-tweet ito sa kanila na bakit doon pa nila napag-usapan sa Twitter na nababasa ng lahat. Bakit hindi na lang daw nila ito tinext kung gusto nilang pag-usapan ang pagkahawak sa dibdib niya.
Siyempre, feeling naman ni Cristine, parang nabastos siya dahil okay na sana ‘yung nasalo siya ni Zanjoe. Pero ‘yung nilagyan pala ito ng malisya ng aktor at pinag-usapan pa ng isang kaibigan niyang direktor, parang hindi nga naman maganda.
Nag-sorry naman daw si Zanjoe sa kanya pero parang hindi raw niya naramdaman ang sincerity ng pag-sorry nito kaya irita pa rin ito.
Kung anu-anong tini-tweet ni Cristine ngayon para ma-express lang niya ang irita niya sa ginawa sa kanya ni Zanjoe.
Mga Mata ni Lolita
by Lolit Solis
