MAY MATINDING DAHILAN pala kung bakit dumistansiya kay Cristine Reyes ang kanyang mga kasamahan sa Banana Split. Dumistansiya ang mas tamang terminong dapat gamitin, hindi pinagkaisahan. Dahil kung tutuusin, walang anumang ginagawang masama sa dalaga sina RR Enriquez, Angelica Panganiban at Pokwang.
Ang insidente ay naganap sa isang okasyon kung saan inimbitahan ang mga artista ng ABS-CBN para mag-perform. Maayos ang daloy ng trabaho, masasaya ang mga artista, hanggang sa may narinig na lang ang lahat ng nandu’n na may nagtutungayaw na babae.
Sinisigawan ng babae ang kanilang EP (executive producer). Meron siyang reklamo tungkol sa isusuot niyang damit sa pagsasayaw. Nanliliit ang mga nandu’n habang binabastos ng babae ang kanyang EP.
Minarkahan ng mga tao sa paligid ang inugali ng babae, EP pa naman niyang naturingan ‘yung tao, pinakatagapamahala ng programang kinabibilangan niya sa network. Pero dahil sa maliit na bagay lang, nagawa niya itong bastusin.
“Si Cristine Reyes ang babaeng nambastos sa EP nila. Maraming nakakita-nakarinig sa ginawa niya sa kanilang EP, maraming napailing na lang sa ginawa niya,” kumpirmasyon ng aming impormante.
Mula noon, dumistansiya na sina Angelica, RR at Pokwang kay Cristine. Para silang nailang sa kanilang kasamahan. Hindi nila kayang tanggapin ang ginawang pambabastos ni Cristine sa kanilang EP.
Ang naging barometro ng tatlong kasamahan ni Cristine, kung sa kanilang EP ay nagawa niya ‘yun, sa kanila pa kaya ‘yun hindi magagawa ng dalaga?
“Mula noon, parang dumistansiya na sina Pokwang, Angelica at RR kay Cristine, nakita kasi nila ang nangyari. Binastos talaga niya ang EP ng Banana Split.
“Kayo man ang lumagay sa posisyon nu’ng tatlo, hindi ba kayo magdadalawang-isip na kaibiganin pa rin si Cristine sa klase ng attitude na meron siya?
“Nu’ng makahalata na si Cristine na medyo dumidistansiya na sa kanya ‘yung tatlo, du’n na siya nagsimulang magkuwento ng kung anu-ano sa mga nakakausp niya. Pinagkakaisahan daw siya nina Angelica, Pokwang at RR.
“Hindi siya pinagkakaisahan dahil gusto siyang ibagsak at siraan ng tatlo. Dumistansiya sa kanya ang mga kasamahan niya dahil sa ipinakita niyang ugali. Sino naman ang magkakagustong maging kaibigan ang isang bastos na tulad ni Cristine?” Patuloy na kuwento pa rin ng aming source.
TAMA NAMAN ANG linya ng argumento ni Cristine Reyes. Hindi na raw siya masaya sa ABS-CBN, kaya gusto na niyang bumalik sa GMA-7. ‘Yun naman ang batas ng buhay, kapag hindi ka na masaya, lumabas ka. Dahil mas mahirap ang magpanggap at magtiis.
Pero kailangang maging malinaw na ang kalungkutan ni Cristine ngayon sa bakuran ng ABS-CBN, lalo na sa bisinidad ng set ng Banana Split, ay hindi galing sa ibang tao.
Siya mismo ang gumagawa ng kalungkutan. Sa kanya nanggagaling ang dahilan para layuan siya ng kanyang mga katrabaho, at kapag higit na sa isa o sa dalawa ang umaayaw sa kanya, kailangan nang manalamin ni Cristine Reyes para matanong niya ang kanyang sarili kung ang mga ito ba ang mali o siya na?
Kahit saang lupalop makarating si Cristine, kung ang problema ay nasa kanya, wala siyang makakasundong katrabaho. Palagi lang siyang irereklamo dahil sa kanyang attitude problem.
Topakin kung ilarawan ng marami si Cristine. Depende sa lagay ng panahon ang kanyang mood. May mga pagkakataong pormal siya at walang kibo. Pero meron namang mga panahong para siyang sinisilihan sa puwet na hindi mapakali sa isang lugar sa sobrang kakulitan.
At hindi kagandahan ang tabas ng dila ng dalagang ito. May nabasa na kaming mensahe niya sa isang artista, napakalayo ng kanyang pananalita sa simple niyang hitsurang napapanood natin sa telebisyon.
Napakalayo.
Cristy Per Minute
by Cristy Fermin
