DUMATING NA pala si Dra. Vicki Belo nu’ng nakaraang Lunes ng umaga. Galing ito ng Amerika, at siyempre hindi nito kasama si Hayden Kho, Jr., dahil hindi naman daw totoong sumunod siya roon.
Kasama lang yata ni Vicki ang make-up artist niyang si Marife. Pero and nakakaloka, dumating daw ito sa arrival area na naka-wheelchair at nakatalukbong daw ang mukha.
May media kasing nakatunog na darating ito kaya nag-abang sila sa airport. Ayaw niyang magpa-interview o makunan man lang kaya nagtago ito, sa pamamagitan nang pagsakay sa wheelchair at tinakpan ang mukha.
Pero hindi pa rin nakaligtas sa media, nahalata pa ring siya ‘yun kaya nagtanggal na lang siya ng takip at napilitan itong magsalita.
Tipid lang naman ang sagot niya, pero kinumpirma nito na wala na nga sila ni Hayden, at mukhang tuluy-tuloy na ito.
Ewan ko lang, ha? Kung totoo na talaga ‘yan, pero nagsalita na itong ibinigay na raw niya lahat pero ganu’n pa rin, kaya natuto na raw siya, mabuting sarili na lang daw ang mamahalin niya.
Pero napapag-usapan na rin kasi na meron na raw ipinalit si Vicki kaya nakipaghiwalay na ito. Ang tsismis, ang yoga instructor daw niya ang ipinalit nito kay Hayden, kaya bongga rin ang Vicki, ha!
Hindi pa sinasagot ni Vicki ‘yan, pero malalaman din natin. May narinig na nga akong pangalan eh, pero mahirap na kasi hindi pa ito kumpirmado at hindi pa nahingan ng sagot si Vicki tungkol diyan.
Nabasa ko naman sa PEP kamakailan lang na nakita raw si Hayden sa isang building sa may Ortigas, kung saan naroon daw si Nancy Castiglione. Abangan na lang natin at lalabas din ang totoo d’yan!
Parang asiwa naman kasi na sa dami ng pinagdaanan ng relasyon nila, ‘yun lang pala ang kahahantungan. Meron pang kuwentong kasalan, tapos maghihiwalay rin pala at kung totoo man, nakahanap na rin pala ng kapalit. Bongga, ‘di ba?
ANG ISA pang lumalalang gulo ay itong away nina Annabelle Rama at Nadia Montenegro. Damay na ngayon ang mga anak nila.
Sinabi pa naman noon ni Annabelle na ayaw niyang madamay ang mga anak niya dahil ayaw lang niya ito kay Nadia, pero hindi na yata ganu’n ang nangyayari, dahil meron nang Richard Gutierrez vs. Ynna Asistio na drama.
Naging isyu kasi ‘yung nangyari sa Party Pilipinas nu’ng nakaraang Linggo na isa sa mga guest hosts si Richard.
Tamang-tama naman, kay Richard napunta ang pag-introduce sa isang segment, kung saan isa si Ynna sa magpi-perform.
Tanging si Ynna lang ang hindi na-mention ni Richard kaya nabigyan ito ng malisya. May mga nag-tweet at ang una siyempre sa mga nag-react ay si Nadia.
Nagsalita ito sa hearing niya kinabukasan na hindi raw naging professional si Richard dahil trabaho lang naman ‘yun, bakit isinali pa ‘yun sa gulo nila.
Actually, mababang isyu lang iyan, pero siyempre napag-uusapan dahil may away ang mga nanay nila, kaya dagdag na gulo na naman.
Sabi ni Nadia at ng abogado nito, magpapadala raw sila ng complain sa GMA-7, dahil hindi raw naging professional si Richard at namersonal daw ito kay Ynna.
Galit na galit yata si Annabelle dahil pilit na pinalalaki raw ni Nadia ang mababaw na isyung iyan.
Hindi naman daw papatulan ni Richard ang intrigang ‘yan dahil starlet lang naman daw itong makakabangga niya.
Pero ayaw ring paawat ang Nadia, kung anu-ano ang itini-tweet laban kay Richard at sinasabi pa niyang tinext na naman daw siya ni Richard ng kung anu-ano.
Hay, naku! Sobrang gulo na! Paano kaya matatapos ‘yan?
May pananaw rin ako sa gulong ‘yan, pero ayoko na munang magkomento. Tingnan ko na lang muna sila na patuloy na nagsasabong!
Mga Mata ni Lolita
by Lolit Solis
