KINUMPIRMA SA amin ni Ai-Ai delas Alas na hiwalay na talaga sila ng kanyang asawa na si Jed Salang nang magkausap kami sa dressing room niya sa Araneta Coliseum last Friday night after her performane sa jampacked concert ni Vice Ganda. “Fifteen days na. Nu’ng May 2 pa,” pag-amin ng Comedy Queen.
Humagulgol pa ng iyak sa amin si Ai-Ai at yumakap nang mahigpit sa sakit ng pinagdaraanan niya ngayon. “Hindi ko alam kung anong ginawa kong masama sa kanya bakit nagawa niya sa kin ‘to,” patuloy ng aktres habang walang tigil sa pag-iyak.
Tatlong bagay ang sinabi sa amin ni Ai-Ai na maaari sigurong naging hudyat ng pagkalas niya sa batang asawa: casino, third party at domestic violence.
Para sa buong tunay na istorya ng kanilang hiwalayan, inimbita kami ni Ai-Ai sa interview ni Tito Boy Abunda sa kanya para sa The Buzz na umere kahapon sa ABS-CBN.
Bago pa lang mag-umpisa ang panayam ng King of Talk kay Ai-Ai ay hindi na niya mapigilan pa ang pagbagsak ng kanyang mga luha.
Nag-away raw sila ni Jed nu’ng May 2 sa kanilang bahay na pagmamay-ari niya, kung saan daw sila nagkasakitan physically, dahil gusto raw ng asawa niya na i-celebrate nila ang kanilang monthsary sa isang hotel casino na ayaw naman niya.
Ayon kay Ai-Ai, wala naman daw kasi silang ibang gagawin sa hotel casino kundi ang maglaro ng casino na ayaw na niya, dahil nahihiya siya na nakikita ng mga tao na naglalaro.
Bukod sa pananakit daw ni Jed sa kanya ay natatakot din daw si Ai-Ai na nakikita niyang sinasaktan din ng una ang kanyang sarili.
Tanging rosaryo ang hinawakan niya at dasal daw ang kinapitan ni Ai-Ai nu’ng mga oras ng kanilang pag-aaway sa loob ng kanyang kuwarto hanggang sa lumipat at nagkulong siya sa kuwarto ng anak na si Sophia na kasalukuyang nasa Amerika.
Nu’ng araw ring yon ay umalis daw siya ng bahay niya at pumunta muna sa Tagaytay dahil sa labis na takot.
Inamin ni Ai-Ai sa interview ni Tito Boy na sumailaim siya sa psychotherapy na in-advise daw sa kanya ng stepfather ni Jed dahil sa mga pangyayari sa pagitan nilang mag-asawa, kahit bago pa siguro sila ikasal, dahil baka raw may mga unresolved problems in her past life or relationships.
Kuwento ni Ai-Ai, average naman daw ang kanyang results, ayon sa kanyang psychotherapist. Nagkakaroon nga lang daw siya ng depression.
Pero si Jed daw ay hindi nagpa-psychotherapist, dahil in denial daw ito na may problema silang mag-asawa.
Huli raw nagkita at nagkausap sina Ai-Ai at Jed nang surpresahin siya ng huli sa Salon de Manila kamakailan lang.
Nakiusap daw si Ai-Ai sa kanyang mga kaibigan sa salon na tulungan siya na paalisin na si Jed.
Hindi na raw kaya ni Ai-Ai na makita pa at makausap ang asawa. Takot daw talaga ang kanyang nadarama ‘pag nakikita niya si Jed at naaalala. Nanginginig daw talaga ang aktres, ayon sa kanyang malapit na kaibigan. “Traumatic talaga,” sambit ng komedyana.
Sa ngayon, may ilang security ang nakabantay kay Ai-Ai, kahit saan siya naroroon, gano’n din sa anak nitong si Sancho.
Napakasakit din kay Ai-Ai nang madiskubre niyang nagkikita pa rin diumano ang kanyang asawang si Jed at ang ex-girlfriend nito kung saan may anak ito rito.
May malalim pa raw na dahilan na nalaman si Ai-Ai kung bakit masakit para sa kanya ang pagkikipagkita ni Jed sa dati nitong nobya. May pinanghahawakan daw siyang ebidensya. Kaya lahat daw ng kutob niya at nakakarating sa kanya ay tama.
Hindi na rin nahiyang aminin sa amin ni Ai-Ai na dahil sa mga ginawa sa kanya ng asawa ay binawi niya mula rito ang iniregalo niyang sports car na Camaro na ilang milyon ang halaga. “Disente ang stepfather niya. Pinasauli naman,” sey ni Ai.
Sa ngayon, ipinapaasikaso na ni Ai-Ai sa kanyang mga abogado ang pag-file ng divorce ng kanilang kasal sa Amerika. Ikinasal sina Ai-Ai at Jed sa Las Vegas nu’ng last month, April.
Sa huli ay humingi ng tawad si Ai-Ai sa kanyang tatlong anak na sina Sancho, Soc at Sophia, at sa kanyang sarili dahil sa pagkakamaling kanyang pinasok. Nagpapasalamat din ang aktres sa mga taong patuloy na nagmamahal sa kanya at rumerespeto.
Franz 2 U
by Francis Simeon
