TINANGGIHAN NI DAIANA Menezes ang alok na kasal ng director na si GB Sampedro, ‘di dahil sa hindi gusto ni Daiana ang guwapong director, kundi dahil hindi pa ito handa at kailangan daw nito munang kausapin ang kanyang mga magulang at ipakilala nang personal si Direk GB.
Kung si Daiana raw ang masusunod, 5 years for now bago siya lumagay sa tahimik at kung mahihintay raw siya ni Direk GB, baka-sakaling ito na ang kanyang makatuluyan. Hindi naman daw inililihim ni Daiana na tinanggap niya ang expensive na singsing na bigay sa kanya ni Direk GB na sa tingin namin ay nagkakahalaga ng humigit kumulang na 200k. Pero hindi ito sinusuot ni Daiana dahil gusto raw muna niyang makilala si Direk GB ng kanyang parents. At ‘pag okey ang nasabing director, tsaka lang susuotin ni Daiana ang singsing.
Ngayon daw ay nasa estado sila ng kinikilala ang isa’t isa lalo na’t 5 months pa lang ang kanilang relasyon. Kaya naman daw sobrang aga pa talaga para pag-usapan ang tungkol sa kasal. Gusto raw muna nitong i-enjoy ang pagkadalaga, lalo na’t 24 years old lang siya at para sa kanya ay napakaaga pang edad para lumagay sa tahimik.
BONGGA ANG NAGING selebrasyon ng ika-3 anibersaryo ng Banana Split na ginanap sa Club Muwah, kung saan pinaghandaan at pinag-isipan ang mga production na kanilang ginawa, mula sa opening kung saan humataw sa dance floor ang SexBomb Girls na sina Sunshine Garcia at Aira Bermudez, kasama ang buong casts ng BS headed by Angelica Panganiban, Jason Gainza, John Prats, Pooh, Ryan Bang, atbp.
Present ang isa sa boss ng ABS-CBN na si Ma’am Linggit Tan at ang ibang ABS-CBN stars like Bianca Manalo na sinasabing GF ni John Prats, Derek Ramsay na BF ni Angelica Panganiban, PBB Teens na si Ivan Dorschner, atbp.
‘Di magkamayaw sa katatawa ang mga manonood sa mga guest stand-up comedians para sa kanilang Clown In A Million segment, at sa kani-lang mga skit na hinanda. Habang napasayaw naman ang mga manonood sa iba pang production numbers na kanilang inihanda.
HINDI NA RAW umaasa ang star ng Pahiram ng Isang Ina at Tween Hearts na si Bea Binene na babalik pa sa kanilang bahay ang kanyang Chinese Dad, dahil hinakot na raw nito ang lahat ng gamit nito at almost three months na raw na wala silang koneksiyon ng kanyang ama.
Ito raw bale ang 4th time na nag-alsa-balutan sa kanilang bahay ang kanyang Papa, pero everytime daw na umaalis ito ay hindi umaabot ng isang buwan ay bumabalik na ito sa kanila. Pero this time daw, iba dahil tuluyan na itong ‘di bumalik.
Aminado raw itong nalulungkot pero mas okey na raw ang nangyari kaysa mag-away palagi ang kanyang parents na siyang dahilan ng pag-alis ng kanyang ama. At least ngayon daw, tahimik ang kanilang tahanan at walang naririnig na sigawan mula sa kanyang mga magulang.
Mas okey raw na maghiwalay na muna ang kanyang parents nang sa ganu’n ay lumamig-lamig ang mga ulo nito at baka raw pagtagal-tagal ay ma-miss ng mga ito ang isa’t isa at humantong sa pagbabalikan ng kanyang parents, na siya naman nitong gusto, para raw magsama-sama sila at mabuo ulit ang kanilang pamilya.
John’s Point
by John Fontanilla
