NALOKA AKO NU’NG nakaraang linggo, ha! Sa katigasan ng ulo ko, sumama ako sa crew ng Startalk sa The Lounge na pag-aari ni Hayden Kho para interbyuhin.
Pagdating namin doon, nabigla ang mga staff ni Hayden nang makita ako. Wala raw siya roon sabi ng isa sa mga staff nito. Halos dalawang linggo na raw itong hindi pumupunta roon pero hindi raw nila alam kung nasaan ito.
Natawa nga ako sa sagot ng isang staff niya na baka nasa sagingan naman daw ito, wala naman sa pinyahan. Totoo nga yata ang kuwento nila na nasa retreat daw ito.
Ang sabi ng iba, nasa Bukidnon daw ito nag-retreat, na sa totoo lang, malaki ang pinyahan doon, ha! Pero sabi naman ng ilang malalapit na kaibigan niya, nasa Batangas lang ito nag-retreat at wala raw computer, cellphone at kung anik-anik.
Ganu’n ang drama nitong Hayden, pero nabalitaan ko namang dumalo pa ito sa hearing ng Integrated Bar of the Philippines dahil sinampahan nila ng disbarment case ang abugado ni Katrina Halili na si Atty. Raymund Palad.
Anyway, nu’ng huling nakausap ng Startalk si Dra. Vicki Belo, sinabi nitong mula pa nu’ng bagong taon ay hindi na raw sila nagkikita ni Hayden o kahit nagtatawagan dahil napagkasunduan daw nilang hindi muna sila magkikita hanggang sa birthday nito sa May 20 (na birthday ko rin, ha!).
Ilang buwan din ‘yung break na ‘yun para mapag-isip-isip daw nila kung itutuloy pa ba nila ang relasyon nila o hindi. Birthday kasi ni Vicki sa January 25 at sa Linggo ay lilipad ito pa-Amerika para mag-retreat din daw roon. Bongga sila, ‘di ba? Retreat lang sila nang retreat dahil feeling nila kailangan daw nila ng spiritual healing.
Kaya malalaman natin iyan sa May 21 kung tuloy pa rin sila o hindi. Pero ewan ko lang, ha, kung matatagalan nilang hindi magkikita nang ganu’n katagal.
HINDI NA RAW magsasalita si Kris Aquino tungkol sa kontrobersiya nila ni James Yap, dahil nasabi na raw niya ang gusto nitong sabihin sa The Buzz.
Pero ewan ko lang kung hanggang kailan siya tatahimik at baka magsalita na isa sa mga araw na ito si Mayen Austria na diumano’y sinugod ni Kris. Ito naman ngayon ang kinakalkal ng mga reporters at mga talk shows para sagutin ang mga sinabi ni Kris.
Marami naman ang naniwala sa sinabi ni Kris, pero marami rin ang nagri-react at hindi nila type ang pagsasalita ni Kris.
Dapat daw ay hindi ito sumugod sa bahay nu’ng Mayen at sinunod ang payo sa kanya ng mga kaibigan niya, pati ang pinsan niyang si Reena Teopaco na huwag ituloy ang pagpunta sa bahay nu’ng Mayen. Pero talagang itinuloy ni Kris kaya ito na ngayon, lumaki na at pinag-uusapan na naman siya na sabi ng iba, mukhang gustung-gusto naman ni Kris. May bagong teleserye kasi, kaya tamang-tama na rin sa promo nito.
Kaya hintayin n’yo na lang ‘pag nagsalita na itong Mayen o kung magsasalita na rin si James para magbigay ng kanyang saloobin sa gulong ito.
Alamin na lang natin kung may ginagawa ba si James na magkaayos sila para magkabalikan.
May mga naririnig ako, kaya lang kawawa naman ang mga reliable source. Kaya, saka ko na ikukuwento sa inyo.
Mga Mata ni Lolita
by Lolit Solis
