INIINTRIGA ANG STAR Cinema, na baka gimmick lang daw ang pag-iyak na ginawa nina Gerald Anderson at Kim Chiu nu’ng Tuesday sa ginanap na grand presscon ng pelikulang Till My Heartaches End, kung saan dahil sa hinanakit ay hindi na nakayanan pa ng guwapong aktor na tapusin ang presscon. Nagsisikip kasi ang kanyang dibdib dahil sa kaiiyak. Baka kailangan daw mayroong ibang mapag-usapan bago i-showing ang pelikula. Kasi nga, ang ilang buwan nang pinag-uusapan ay ang tungkol sa kanilang paghihiwalay, ang hindi pag-uusap at ang matindi nilang iwasan factor.
In fairness naman sa Star Cinema, hindi scripted ang mga nangyari. Nu’ng ginaganap ang presscon, magkatabi kami ng katotong Rommel Placente, at malapit ang kinauupuan namin sa tapat ni Gerald. Nagsimulang bumigay si Gerald mula sa mga tanong ng reporter na si Allan Diones, at nakita namin ang pagsisimula ng pag-iyak ng aktor, hanggang sa umalis na siya sa kanyang upuan at hindi na nakabalik pa. Umiyak naman si Kim, habang sinasagot niya ang mga katanungan ng reporter na si Tita Emy Abuan, at ako naman ang nagtanong kay Direk Joey Javier-Reyes kung papaano niya napagsama ang magka-loveteam, sa panahong mayroon silang mabigat na problemang pinagdaraanan sa relasyon?
Pormal daw na kinausap ni Direk Joey sina Kim at Gerald, na kung anuman ang gusot sa pagitan nila, kailangang huwag madamay ang kanilang mga trabaho. Bumilib nga raw si Direk Joey, dahil hindi siya binigyan ng problema ng kanyang mga bida sa movie, dahil hindi niya naramdaman ang tensiyon na hindi nga okey ang relasyon ng dalawa. “Kaya talagang hindi ko pinagsisisihan, na kahit kailangang matapos ko kaagad ang movie na ito, dahil may hinahabol na kaming playdate, sila ang mga naging artista ko. Okey silang katrabaho kesehodang mayroong ganyang problema,” wika ni Direk Joey.
MADAMOT PA RIN naman si Jericho Rosales na maglahad ng buong katotohanan tungkol sa naging dahilan ng paghihiwalay nilang dalawa noon ni Heart Evangelista, kaya hanggang ngayon, parang siya ang lumalabas na masama, at walang nagsisimpatiya sa kanya sa tuwing magsasalita ang Tsinitang aktres, na hindi talaga sila nagkahiwalay at naging magkaibigan pa rin sa bandang huli. Mapapansin naman na pasikut-sikot ang mga salita ni Echo sa kanyang mga paliwanag, kaya hindi pa rin niya nalilinis totally ang kanyang pangalan sa hiwalayan nila ni Heart.
Kahit ngayon, sa pinag-uusapang hiwalayan nila ni Cesca Litton, hindi pa rin naman diretso si Jericho sa mga dapat niyang ipaliwanag kung hiwalay na ba talaga sila talaga at kung ano nga ang tunay na dahilan ng pagkaunsiyami ng kanilang relasyon? Hayun, lumang istilo na naman ng mga artistang nanghihingi, na anuman daw ang pinagdaraanan nila, ibalato na lang sa kanila dahil personal na nilang buhay iyon.
Mabuti na lang, ‘yung naging hiwalayan nila noon ni Kristine Hermosa ay klaro na, at wala nang dapat pang liwanagin. Positibo na ang mga sinasabi ng magandang aktres tungkol kay Jericho ngayon. Na kung babalikan sa isip ang nakaraan, marami raw natutunan si Kristine kay Echo nu’ng panahong sila pa ang magkarelasyon. Okey raw sa ngayon ang kanilang friendship. Kung magkakaroon daw ulit siya ng project, gusto niyang si Jericho ang maging leading man, dahil nariyan pa rin naman daw ang nagmamahal sa kanilang dating tambalan.
ChorBA!
by Melchor Bautista
