MARAMI ANG NAAWA kay Katrina Halili nang magsalita ito sa Startalk nu’ng nakaraang Sabado.
Lalong nairita ang karamihan kay Dr. Hayden Kho dahil lumabas ngang inabuso nito ang pagmamahal sa kanya ni Katrina.
Hindi raw niya alam kung ano ang nagawa niya kay Dr. Hayden (na parang Dr. Jekyll and Hyde ang tingin ko sa kanya, ha!) dahil sa ginawa nito sa kanya.
Ang pagkakamali lang daw niya, nagmahal siya sa maling tao na “for fun” lang daw pala ito sa kanya. Kumbaga, pinaglaruan nga lang talaga nito si Katrina.
Wala naman daw itinago si Katrina, inamin niyang lahat ang pagkakamali at pinagdusahan na raw niya ito. Bakit daw hanggang ngayon hindi pa rin siya tinitigilan?
“Oo sige, tanga ako, sabihin na ng mga tao, tanga ako, tanga nga, ‘di ba? Sorry tao lang po ako, nagkamali ako. Sabihin n’yong tanga ako, o sige tanga na nga eh, ‘di ba?” Lumuluhang pahayag ng kontrobersiyal na seksing aktres.
Aminado itong apektado siya nang husto nang lumabas itong sexy video na ito. May mga endorsement daw siyang naapektuhan at wala nga siyang programa ngayon sa GMA 7.
Siguro naman hindi siya pababayaan ng GMA 7. Sa kanya nga napunta ang awa ng lahat dahil lumabas na biktima siya rito.
Wala man lang tayong narinig kay Dr. Hayden na nag-sorry kay Katrina, kundi kay Dra. Vicki Belo lang.
Ang nakakaloka pa, tinawagan pa pala nitong Hayden ang malapit na kaibigan ni Katrina at sinabihan daw na, “Everything is under control.” Nang kumalat na ang video na ‘yun, sinabihan na naman niya itong, “Stay away from the press.”
Hindi naman puwedeng manahimik na lang si Katrina, kaya dapat naman niyang magsalita para maipagtanggol nito ang sarili niya. Ang pagkakaalam daw niya, apat na tao lang ang may hawak nitong video na ito at isa lang sa apat na ‘yun ang naglabas nu’n.
Nu’ng Mother’s Day nga raw, nagpadala itong taong nagkalat ng video sa Mommy ni Dr. Hayden na ikinaloka siyempre nu’ng Nanay.
Sabi ni Katrina, kung hindi pa raw siya titigilan ng mga ito, mapipilitan daw siyang iparating na ito sa korte. Kailangan naman daw niyang lumaban na, dahil sabi pa nga niya, durog na durog na raw siya sa ginagawa ng mga taong ito.
‘Yung video pa lang ni Katrina ang lumabas. Ano kaya ‘pag lumabas ang iba pang pinagkukuha ni Hayden kasama ng iba ring kilalang celebrity? Naku! Deny nang deny ang iba riyan, paano na lang ‘pag lumabas ang video nila?
Mga Mata ni Lolita
by Lolit Solis
