MARIING ITINANGGI NG lead vocalist ng Parokya ni Edgar na si Chito Miranda na nililigawan niya si Angel Locsin. “I admit na lumalabas kami pero marami kaming kasama dahil grupo kami. No, wala talaga kaming relasyon ni Angel, bukod sa magkaibigan,” tuluy-tuloy na pahayag iyon ni Chito nang makausap siya ng Pinoy Parazzi sa UST kamakailan sa Boto Mo, Ipatrol Mo concert.
Ayon kay Chito, nagkausap na sila ni Angel kaugnay sa isyu. “Wala, nagtawanan lang kami dahil alam naman namin sa isa’t isa na walang katotohanan ang balita. Tsaka hindi naman ako apektado, kasi hindi ko naman ine-entertain ang tsismis na ganyan,” may katarayan pang sagot ni Chito.
Wala na rin daw balak pang makipag-usap si Chito kay Luis Manzano.
“What for? I mean… bakit? Wala naman kaming problema.” Dahil aminado si Chito na kung meron man siyang mahal hanggang ngayon, ‘yun ay ang 7 years niyang katipan na si Kaye Abad na dating girlfriend ni John Lloyd Cruz.
SINABI NI LORNA Tolentino na isang simpleng misa lang ang ibibigay niya sa yumaong asawa na si Rudy Fernandez sa birthday nito sa March 3. “Siguro, pupunta lang ako sa Heritage then after that, tuloy na ako sa bahay,” pahayag ni LT nang makausap siya ng Pinoy Parazzi sa birthday ni Jinggoy Estrada na ginawa sa Blue Leaf.
Ayon kay LT, hindi pa rin daw niya ginagalaw hanggang ngayon ang mga personal na gamit ni Rudy. “Parang hindi pa talaga ako handa. Feeling ko kung gagalawin ko ‘yung mga gamit niya, dapat diretso sa isang mas maganda at maayos na lugar at hindi pa tapos ‘yung pinare-renovate kong house namin.”
Sinabi ni Lorna na madalas pa rin niyang nararamdaman ang presence ni Daboy. “’Yung last na panaginip ko sa kanya, e nakakatawa talaga. ‘Yung paramdam niya, dinadaan niya sa panaginip. Actually, kapag naaalaala ko ‘yung last dream ko, natatawa talaga ako. ‘Yun bang parang ginagaya niya ‘yung character sa Mano Po, nagtsa-Chinese siya. Ha-ha-ha!
Sa kabilang banda, ipinagtanggol naman ni Lorna si Mark Anthony Fernandez sa isyung balik-droga raw ito kung kaya’t natanggal sa ilang show sa channel 7. “No, hindi totoo iyan. Alam na ni Mark na hindi maganda sa katawan at isipan ng tao ang drugs dahil pinanggalingan na niya iyan. Ang totoo, sabi sa akin ni Mark noong huli kaming magkausap ay parang napapagod siya. Kasi, sunud-sunod talaga ‘yung ginawa niyang soap opera, kaya kailangan niyang magpahinga. Nagpahinga lang si Mark at hindi siya nagbalik sa drugs.” Pagdidiin pa ni Lorna bilang salag sa isyung napapabayaan uli ni Mark ang trabaho, dahil muli itong nalululong sa ipinagbabawal na gamot.
More Luck
by Morly Alinio
