HAY NAKU! BAGO nagsimula ‘yang presscon ni Direk Quark Henares para sa pelikula nilang Rakenrol, nagpasabi na si Dra. Vicki Belo na kung puwede huwag na raw pag-usapan ang tungkol sa isyung engagement nila ni Hayden Kho, Jr.
Naku! Mapipigilan mo ba ‘yan? Sa totoo lang, ‘yun ang sadya ng mga reporters sa presscon na ‘yun, pangalawa na lang ang tungkol sa pelikula niya.
Dumating din sa presscon ang isa pa niyang anak na si Cristalle Henares kaya lalong napag-usapan tuloy ang tungkol sa engagement na iyan at ang balak daw nilang pagpapakasal.
Kung si Quark naman ang tatanungin, hindi raw niya alam kung kailan ang kasal at kung matutuloy ba iyan dahil ang pagkakaalam daw niya, may mga legalities pang aayusin sa unang pagpapakasal ni Dra. Belo.
Mabait naman ‘tong dalawang anak ni Dra. Belo dahil kahit obvious namang hindi sila pabor sa relasyon ng dalawa, maayos naman silang sumagot at wala silang sinasabing ‘di maganda laban kay Hayden.
Naging malaking isyu lang ‘yung sinabi noon ni Quark na dadanak ang dugo kung sakaling masasaktan uli ang Mommy niya kay Hayden.
Siyempre, kung ikaw naman ang anak, ayaw mo namang makitang malungkot at umiiyak ang nanay mo.
Nasaktan na noon si Dra. Belo sa mga pinaggagawa ni Hayden, ang gusto lang naman nila na hindi na mauulit ‘yun.
Hindi na nga naman maganda kung gagawin pa uli ‘yun ni Hayden dahil saan na ba siya ngayon magmula nang naging sila ni Vicki?
Wala naman daw silang magagawa kung mahal talaga ng Mommy nila si Hayden at kung ito ang nagpapasaya sa kanya, kaya nandiyan lang daw sila para sumuporta.
Hindi nga napigilan ni Cristalle na maiyak habang ini-interview ito, lalo nang tinanong kung matatanggap ba niyang magkasama sila ng bahay kapag kasal na ang dalawa.
Aware naman daw sila na may participation sila sa kasal kung sakaling matutuloy ito, pero hindi raw nila alam kung kailan talaga ito at hindi pa naman daw nila ito pinag-uusapan.
Anyway, nandu’n sila para i-promote ang pelikula niyang Rakenrol na magiging closing film sa Cinemalaya sa July 23. Pero sa August 10 na ang showing nito sa mga sinehan, kaya sobrang suportado ito ni Dra. Belo at pati na rin si Hayden.
Tampok pala sa pelikulang ito sina Diether Ocampo, Glaiza de Castro, Jason Abalos, Alwyn Uytingco at Ketchup Eusebio.
May mga kilalang rock artists pa raw ang involved dito kaya magkakaroon pa ng concert sa screening nito sa Ci-nemalaya.
MUKHANG MATAGAL PA ang tatakbuhin nitong kaso ni Maricel Soriano at ng dalawang kasambahay na nag-reklamo sa kanya.
Sa pangalawang pagkakataon, hindi na naman sumipot si Maria sa hearing nito sa Brgy. Poblacion sa Makati.
Nandu’n uli ang dalawa niyang katulong pero walang Maricel o kahit representative nito ang sumipot.
Meron pa palang isang hearing doon at kung hindi pa rin niya ito sisiputin, iaakyat lang daw ito sa Lupong Tagapamayapa at magkakaroon uli ng tatlong hearing.
So, matagal pa ito bago pa umakyat sa korte.
Narinig ko naman sa phone patch interview sa isang kapatid ni Maricel, hindi naman daw nila tatalikuran iyan dahil wala naman daw katotohanan iyan.
Hindi raw totoong lumipad ng ibang bansa ang aktres, dahil wala naman daw dahilan para takasan niya ito.
Haharapin daw nila ito sa tamang panahon at bahala na raw ang korte sa kasong ito.
Mga Mata ni Lolita
by Lolit Solis
