PINAGTAWANAN LANG NG TV host na si Iya Villania ang kumalat sa internet na picture niya kasama ang boyfriend na si Drew Arellano na may karga-kargang bata. Kumalat tuloy ang espekulasyon na may anak na sila ni Drew.
Nagsimulang pinag-usapan sa Twitter ang naturang litrato kung saan karga-karga ni Iya ang isang bagong panganak na sanggol at katabi pa niya si Drew sa larawan. Kuhang may lampin pang nakasabit sa balikat ni Iya para sa paglungad ng bata at ang background pa ay parang ospital. Kaya pinag-usapan tuloy na baka may anak na nga talaga ang dalawa!
Tawa lang nang tawa si Iya dahil naging isang malaking isyu na pala siya at pinag-usapan pa sa The Buzz noong Linggo. Kuwento sa amin mismo ni Iya, anak daw iyon ng best friend ni Drew na binisita nila. Mahilig lang daw sa bata itong si Iya kaya kinarga niya ang baby. ‘Di naman daw niya inakalang pagmumulan pala ng isyu ang litrato nilang dalawa.
Paliwanag pa ni Iya, imposible naman daw na manganak siya at magkaanak dahil siyempre dapat mabuntis muna siya at sa kanyang mga weekly exposures sa Us Girls at sa ASAP XV, hindi naman yata nakitang lumaki o lumobo man lang ang tiyan ng TV host. Kaya, katawa-tawa talaga ang isyung nanganak na siya!
Dapat talaga, mag-extra ingat ang mga artista lalo na sa kumukuha sa kanila ng litrato dahil ito na ngayon ang pinagmumulan ng mga intriga at kontrobersiya sa showbiz!
DAPAT NA SIGURONG pagtuunan ng pansin ni Kim Chiu ang kanyang kalusugan dahil parang marami na ang nakapapansin na medyo sumosobra na ang kapayatan nito. Workaholic daw kasi itong si Kim at talagang ratsada kung magtrabaho, kaya siguro pati ang kanyang kalusugan ay napapabayaan na niya.
May isa kaming kaibigan na nagkuwento sa amin na nag-enroll na pala sa isang gym itong si Kim at kumuha pa ng personal trainer para gabayan siya sa kanyang gain-weight program.
Importante kasi sa mga artista ang panatilihing maayos, malusog at maganda ang kanilang mga katawan dahil puhunan nila ito sa harap ng kamera, bukod sa kanilang magagandang mga mukha at talento.
AYAW NANG MADAWIT ni Carlene Aguilar sa mga isyung kumakalat ngayon tungkol kina Cristine Reyes at Jennylyn Mercado. Wala na raw siya sa buhay ni Dennis Trillo kaya kung sino man ang ma-link sa kanyang dating boyfriend, e wala na raw siyang pakialam. Ang tanging focus na lang niya ngayon ay ang kanyang anak na si Calix at patuloy pa rin naman daw ang pagbisita at sustento ni Dennis sa kanilang anak.
‘Yun na!
