GALIT NA GALIT ang mga tagasuporta ni Jake Cuenca kay Cristine Reyes. Ang galit ng mga fans ng aktor ay nag-ugat sa ipinagkakalat ni Cristine na mabaho ang hininga ng guwapong aktor.
Hindi puwedeng mag-deny ang dalaga. Sa dami ng mga napagsabihan niya na may bad breath nga si Jake, hindi na niya alam kung sino ang ituturo niyang nagpalabas ng kanyang kuwento.
Ayaw namang maniwala ni Jake na kayang gawin at sabihin ‘yun ni Cristine. May kumpiyansa rin ang aktor sa kanyang sarili, alam nito na walang katotohanan ang kuwento.
Pero ang mga fans ni Jake ang nanggigigil sa young actress. Ano raw ba ang gustong palabasin ni Cristine, na pagkalinis-linis niya at wala na siyang kapintasan sa katawan?
Sabi ng mga fans ni Jake, “Ang ganda niya naman kasi, e, hindi natural, puro ‘salamat po, doktor’ ang mga parts ng katawan niya. Ang ilong niya, halatado namang ipinagawa niya!
“Nakita na namin siya nu’ng hindi pa siya artista at sumasama-sama pa lang siya kay Ara Mina, hindi naman ganyan ang ilong niya noon! Mamintas siya kung totoo ang kagandahan niya!
“Napakarami niyang kaaway, wala siyang kasundo, ang sarili lang niya ang dapat sisihin dahil masyado siyang madaldal at pintasera!” Sabi pa ng mga tagahanga ni Jake Cuenca.
Baligtarin daw natin ang situwasyon. Paano raw kung mapuno na si Jake Cuenca at ito naman ang magkuwento tungkol kay Cristine, ano raw kaya ang masasabi ng dalaga?
Ang tanong, meron ba namang dapat ibuyangyang si Jake tungkol kay Cristine? Isa pang tanong, masikmura naman kaya ng binata na magsalita laban sa dalaga?
Meron daw. Hindi lang daw natin alam nang detalyado ang kuwento, pero meron palang naging relasyon ang dalawang ito? Natural, dahil naging magkarelasyon nga sila, meron ding puwedeng sabihin si Jake tungkol sa dalaga. Ang tanong na lang ngayon, kung ganu’ng klase ba naman ng lalaki si Jake?
“Galit kasi sa mundo ang babaeng ‘yun, e! Kaya siya ganyan, wala siyang magandang nakikita sa kapwa niya, palagi siyang nega, dahil siya mismo ang may problema sa sarili niya!” Hirit pa ng mga tagahanga ni Jake Cuenca.
ANG AKALA NAMI’Y tapos na ang problema nina Ted Failon dahil nilinis na ng korte at ng NBI ang kanyang pangalan tungkol sa matinding trahedyang naganap sa kanyang pamilya.
Nakabalik na sa himpapawid ang magaling na broadcaster, nakakaya na niyang magpanggap na okey na ang lahat sa kanya. Kahit pa alam naman nating hindi ganu’n kadaling kalimutan ang naganap sa kanyang asawa.
May impormasyong nakarating sa amin na meron pala siyang tinatanggap na death threats. Nanggagaling ang mga pagbabanta sa mga numerong hindi niya kilala. Pinag-iingat ng mga texters si Ted sa paglabas-labas niya ng bahay.
Puwedeng totoo ang mga pagbabanta dahil may mga nasagasaan sa naging resulta ng imbestigasyon ng NAPOLCOM sa pagmamalabis ng ilang awtoridad nu’ng kasagsagan ng kanilang pagluluksa.
Puwede rin namang gawa-gawa lang ‘yun ng mga taong gustung-gustong nakakakita ng mga taong namomroblema at natatakot. May mga tao talagang sa kawalan ng magandang magagawa sa buhay, kung anu-ano na lang ang nagagawa.
Pero kailangan pa ring mag-ingat ni Ted Failon. Paano kung seryoso pala ang mga nagbabanta sa kanya? Iba na ang nag-iingat para hindi siya mapuruhan ng mga taong nagtatangka sa kanyang buhay.
Matindi naman ang kapit ni Ted sa kanyang pananampalataya. Naniniwala siya na kapag sinsero ang panghihingi niya ng patnubay, hindi siya pababayaan. Ngayon siya higit na kailangan ng kanyang mga anak na sina Kaye at Karishma.
Cristy Per Minute
by Cristy Fermin
