WALA NAMANG PAKIALAM si James Yap kung sa tingin ng maraming tao ay nagmumukha na siyang kawawa ngayong ipinaaayos na talaga ni Kris Aquino ang legalidad ng kanilang paghihiwalay mula sa mga naatasan niyang abogado, bago siya pumuntang Amerika kasama sina Joshua at Baby James. Umiiwas talaga siya sa media at ayaw magpa-interbyu, dahil para sa kanya ay mas lalala ang kinakaharap nilang gusot ni Tetay, kung magsasalita pa siya.
May katuwiran naman daw si James na iwasan niya ang magpa-interbyu, dahil hindi naman siya showbiz na tao. Basketbolista lang daw siya, at nagkataon lang na taga-showbiz si Kris, kaya napag-uusapan na rin siya. Hindi naman siya nagkamali ng mga pag-iwas sa media, dahil nakawiwindang na rin ang mga tanong na ibinabato sa kanya ng press. Isa sa pinakamatinding tanong na kanyang natanggap ay ang tungkol sa kontrobersiya ngayon, kung saan iniuugnay ang pangalan ni Kris kina Senator Chiz Escudero, Gerald Anderson at Coco Martin.
Parang ang dating ay habang nagsasama pa sila noon, ay mayroon palang ibang lalaki na kinahuhumalingan si Kris. Pero consistent si James sa kanyang intensiyon na mabuo pang muli ang pagsasama nila. Wala raw siyang masasabi tungkol sa lumulutang ngayong usapan na iniuugnay si Tetay kina Escudero, Gerald at Coco. Iba raw ang naging problema nila ng mommy ni Baby James, pero hindi niya nararamdaman ang ugnayan ni Kris sa mga lumulutang na pangalan ng lalaking iniuugnay sa kanya.
KAPAG USAPANG-SHOWBIZ, PINALALAMPAS na lang ni Lorna Tolentino ang mga papuri sa kanya, na pagkatapos ng halos tatlong taon niyang pagdadalamhati mula sa pagkakaroon ng karamdaman hanggang sa yumao ang kanyang husband na si Rudy Fernandez, may kakaiba na raw siyang sigla sa ngayon. Naaasiwa siyang pakinggan ang sinasabi ng ibang tao, na para raw mayroon na siyang bagong inspirasyon, kaya nagkakaroon na siya ng pagbabago kung hitsura ang titingnan.
Ang hindi raw alam ng marami, nasasaktan si Lorna kapag ine-engganyo siya ng ibang tao na para bang subukan na ulit ang isang bagong pakikipagrelasyon, dahil bata pa rin naman siya. Katuwiran ni LT ay hindi naman ganu’n kabilis, na pagkatapos ng masakit na nangyari sa kanilang pamilya ay ang susunod na makakarelasyon ang hahanapin.
“Sa totoo lang, ang dami-dami ko pang dapat gawin, na mga ibinilin sa akin ni Rudy. Lahat ‘yon, iniisa-isa kong isakatuparan na gawin,” wika ng magaling na aktres.
Para kay Lorna, hindi sarado ang posibilidad na muli siyang magmahal sa ibang lalaki. Hindi lang daw niya talaga alam kung kailan iyon mangyayari. Sa ngayon daw, nararamdaman niya na happy na rin ang yumao niyang husband.
“Kasi nga, ang palatandaan naman na okey na ako ay ‘yung nakabalik na ako sa aking trabaho. Gumagawa na ako ng teleserye, at nagpe-pelikula na rin ako. Masaya na ako, dahil alam kong gusto rin niyang maging masaya ako lagi,” sey pa ni LT.
ChorBA!
by Melchor Bautista
