BAKIT GANUN? PAGKATAPOS magsalita ni Kris Aquino tungkol sa balak niyang pag-alis ng The Buzz, karamihan ay hindi nakaramdam ng simpatiya sa kanya.
Siyempre, ayokong magkomento, kasi sabihin na naman biased ako dahil lagi ko namang inookray si Tetay. Pero love ko pa rin naman iyan kahit papaano.
Ang naririnig ko lang sa mga umpukan ng mga reporters, hindi sila naawa o nataypan ang pagsasalitang ‘yun ni Kris dahil ang dating, parang nangampanya lang ito.
Parang subtle daw ang pangampanya nito para sa kapatid niyang si Noynoy. Kaya tuloy, may mga nag-react ng mas matinding komento laban sa kanya at as usual, damay na naman si Noynoy.
Natapos ang mahabang pahayag niya sa The Buzz nu’ng Linggo, hindi naman niya nilinaw kung talagang aalis na ba siya o tutuloy pa rin siya sa paghu-host sa showbiz talk show nila.
Palagay ko naloloka na rin si Boy dahil siya ang naiipit, siya ang ginugulo ng mga reporters at hinihingan ng sagot tungkol diyan. Pero desisyon iyan ni Kris at ng pamilya nga niya, hindi natin alam kung ano na talaga ang napagkasunduan nila.
Kaya tuloy, ang huling tsika sa Showbiz News Ngayon nu’ng kamakalawa ng gabi, abangan na lang daw kung mapapanood pa ba si Kris sa The Buzz o hindi.
Sabihin na naman ng iba diyan, gimmick na naman iyan para abangan lang ang The Buzz.
Well, wala naman tayong magagawa, mainit pa ring pinag-uusapan si Kris at paborito pa rin natin siyang topic kaya hot na hot pa rin siya.
Ewan ko lang kung makatutulong pa ito sa kapatid niya, abangan na lang natin. Malapit na rin naman ang eleksiyon, magkakaalaman naman iyan!
PANAY PA RIN ang renew ngayon ng kontrata ng mga Kapuso stars at nu’ng nakaraang linggo nga, sunud-sunod ang contract-signing at mga alaga ko na lang ang wala, huh! Type pa kaya ng GMA-7 ang mga alaga ko? Naku ha!
Ako nga ni-renew ang kontrata, ang mga alaga ko wala pa? Naku ha!
Anyway, kasabay kong pumirma ng kontrata si Janno Gibbs at as usual, late na naman ito nang dating.
Kaya naging biruan tuloy roon na kasama yata sa kontrata na hindi na ito puwedeng ma-late.
Kahit siguro nakakontrata pa iyan, wala na silang magagawa dahil hindi na iyan mababago – ang laging pagdating nang late ni Janno. Pero in fairness naman, pagdating niyan, handang-handa na siya at puwede na siyang isalang.
Ewan ko kung ganu’n pa rin siya sa Party Pilipinas, dahil isa ito sa nag-conceptualize sa bagong musical-variety show na ng GMA-7.
Sila na nga yata ni Ogie Alcasid ang creative consultant sa bagong show na ‘yun kaya inaasahang mas maganda ito at mas bago ang mga mapapanood.
Ang isa pala sa napansin doon sa contract signing, hindi kasama ni Janno si Bing Loyzaga na obvious namang may show sa kabilang istasyon.
Hindi naman nasagot ni Janno ang intriga kung talagang tuluyan na nga ba silang naghiwalay.
Kasi sa huling interview ng Startalk kay Bing, parang malabo na at sabi nga nito mananatiling magulang sila sa kanilang mga anak.
Si Janno naman ay quiet lang kaya baka nga talagang wala na sila ni Bing, at baka ang susunod na mabalitaan natin, inaayos na pala ang annulment. Naku! Dapat na sagutin iyan ni Janno.
Mga Mata ni Lolita
by Lolit Solis
