NA-UPSET NAMAN AKO sa nabalitaan ko tungkol kay Janno Gibbs na dumadaan daw ngayon sa matinding depression?
Nasulat na ito ng ibang kolumnista pero matagal ko na itong naririnig. Kaya lang, hindi ko naman nakakausap si Janno kaya hindi ko nakumpirma kung totoo o hindi.
Pero napapansin ko ngang pasulput-sulpot lang ito sa Party Pilipinas at wala naman siyang ibang show na nilalabasan.
Ang kuwento naman ng ilang taga-Party Pilipinas, lagi naman daw nilang binibigyan ng production number si Janno, pero basta na lang itong hindi sumisipot.
Dati raw nali-late lang ng dating at expected na nila iyan, pero ngayon ay talagang hindi na dumarating. Ano kaya ang problema nito?
Hindi na rin kasi nagsasalita si Bing Loyzaga tungkol sa isyu nilang mag-asawa kaya wala talaga tayong ideya kung ano na ang kanilang situwasyon.
Ewan ko lang kung totoo, ha? Pero may nakarating ding kuwento sa amin, meron daw pumunta sa bahay ni Janno at magulo raw ito na parang walang nag-aayos.
Paano, lagi lang daw ito sa kuwarto at hindi lumalabas. Wala ring nakaaalam kung ano ang pinagdadaanan nila pero talagang depressed daw ito ngayon.
Kung tungkol sa career ang ikina-depress niya nang husto, nasa kanya na rin ‘yun. Kung nagtrabaho lang naman siya nang maayos, tiyak na bibigyan naman iyan ng show ng GMA-7.
Minsan nga raw kinausap ito ni Kuya Germs na magtrabaho na siya nang maayo,s pero nang sumunod na Linggo, hindi na sumipot ng Party Pilipinas.
Sinusubukan ito ng Startalk na makapanayam pero hindi siya sumasagot ng mga tawag kaya abangan na lang natin kung magsasalita ito tungkol sa kalagayan niya ngayon.
MAY ISA PA kaming kuwentong mapapanood n’yo sa Startalk bukas, tungkol sa isang character actress na naghihirap na raw at nagtitinda na lang daw ito ng barbecue sa labas ng bahay niya.
Nagsimula lang ‘yun sa blind item at natukoy ngang si Melissa Mendez ‘yun. Natawa na lang ang aktres sa balitang ‘yun dahil ano naman daw ang masama sa pagtitinda ng barbecue.
Oo nga naman! Masipag kasi talaga si Melissa at masarap siyang magluto kaya ginamit niya ito habang wala naman siyang regular show na ginagawa.
Sinadya ito ng Startalk at hindi ikinahihiya ng aktres kung nagtitinda naman siya ng barbecue.
Sabi nga niya, sana hindi na raw siya na-blind item. Puwede naman daw banggitin ang pangalan niya para ma-promote pa ang mga tinda niya sa may labas ng bahay niya sa Mapayapa Village.
In fairness, mabenta nga ang tinda ni Melissa at hindi niya ito ikinahihiya. Pero hindi naman daw ibig sabihing naghihirap na siya.
Kapag wala raw siyang taping o shooting, naisip niyang magtinda sa tulong ng kapatid niya at maganda naman ang resulta kaya tinuluy-tuloy na niya.
Abangan n’yo ang inspiring na kuwento ni Melissa sa Startalk bukas.
Mga Mata ni Lolita
by Lolit Solis
