ABANGAN N’YO BUKAS sa Startalk dahil lilinawin na ni LJ Reyes ang isyung buntis ito.
Siyempre hindi ko pa alam kung totoo o hindi dahil tahimik lang sila ngayon at ang tatay-tatayan niyang si Rommel Gacho ang nakausap niya.
Nakatakda na kasi itong umalis pa-Amerika dahil matagal na raw itong nakaplano gawa nang magpapagamot daw siya roon. Matagal na raw kasi niyang iniinda ang matinding back pain kaya ang Mommy na niya ang nagdesisyon na roon na siya sa Amerika magpapagamot.
Pero lalong pinag-uusapan ngayon itong buntis isyu at si Paulo Avelino ang nadadamay dahil siya raw ang nakabuntis. Kaya bago umalis pa-Amerika si LJ ay magsasalita na siya at lilinawin niya ang isyung ito.
So far, mga kaibigan niyang sina Ryza Cenon at Chynna Ortaleza ang nagtanggol sa young actress at itinatanggi ang isyung ‘yun.
Sabi ni Chynna, matagal na raw ‘yung sakit na ‘yun ni LJ at matagal na niyang pinaplanong pumunta sa Mommy niya sa Amerika para roon na magpagamot. Kaya huwag na raw isyuhang buntis ito dahil hindi naman totoo.
Ewan ko lang, ha? Kasi reliable naman ang source namin at may mga nakakita na ngang medyo lumalaki na ang tiyan nito. At bukod pa riyan, nagpaalam na si LJ sa GMA Artist Center ng indefinite leave.
Pagkatapos, iisa lang lang ang tinuturong nakabuntis dahil matagal na ring natsitsismis na may relasyon sila ni Paulo Avelino. Kaya dapat na magsalita na silang dalawa para malinawan na ito.
Abangan n’yo na lang sa Startalk dahil wala naman daw silang itatago. Sasabihin naman daw nila ang totoo, kaya abangan n’yo na lang!
NAKIKIUSAP NA SI Jennylyn Mercado na kung puwede tigilan na ang isyu nila ni Dennis Trillo dahil umamin na rin naman sila tungkol sa nadi-develop nilang relasyon. Kung puwede, wala na raw makisawsaw para lalo lang mapag-usapan.
Pagkatapos kasing makunan ng reaksiyon si Cristine Reyes, itong VJ na si Andrei Felix naman ngayon ang nakakalkal dahil may nagparating na sobrang nalungkot daw ito nang nabalitaan ang tungkol sa dalawa.
Matagal nang nali-link si Jennylyn dito kay Andrei at ang sabi lang naman ng aktres, dating lang sila ni Andrei, walang namagitan sa kanilang dalawa.
Pero may nagtsika na nu’ng umalis daw sina Jennylyn at Dennis pa-Hong Kong, may nag-tip na raw nito kay Andrei kaya hinanap daw niya noon si Dennis dahil nakumpirma na nga niyang nag-Hong Kong si Jennylyn.
Sabi na lang ni Jennylyn, walang nakarating sa kanya na ganu’ng reaksyon mula kay Andrei.
Kung meron nga raw ganu’ng sinasabi si Andrei, sana manahimik na lang daw ito dahil hindi naman daw siya kasali sa isyu.
“Sana huwag na siyang makisali, para hindi na gumulo,” text ni Jennylyn sa isa naming reporter.
Kung ano man daw meron sila ni Dennis, tiniyak naman daw nilang walang masagasaan, lalo na itong si Andrei.
Kunsabagay, hindi pa naman nagsasalita itong si Andrei dahil hindi naman talaga siya mahilig magpa-interview kaya tingnan na lang natin kung mananahimik na lang nga siya.
Si Dennis naman ay hindi na raw magpapa-interview kapag tungkol sa kanila ni Jennylyn ang mga tanong, dahil wala naman daw silang puwedeng sabihin pa pagkatapos nilang umaming nasa dating stage pa lang sila.
Mas gusto naman daw niya kasing tahimik lang ang lovelife niya para hindi na magulo.
Mga Mata ni Lolita
by Lolit Solis
