Natatandaan ba ninyo si Amanda Amores? ‘Yung aktres na sumikat noon sa mga pene-kulang hubaran? Well, masaya at maganda na pala ang takbo ng buhay nito ngayon, kung saan taliwas sa mga nakasabayan niyang hubadera noon.
Kung sina Vida Verde, Cherry Madrigal, at Brandy Ayala ay nalulong sa droga at naghirap (kung saan ay nabaliw pa nga si Brandy), kaiba ang drama sa buhay ni Amanda. Si Amanda ngayon ay asawa ng isang negosyanteng Intsik.
“Hindi ko naman ikinahihiya ang mga ginawa ko nu’n. Pero kung maaari, ayoko nang balikan pa dahil masaya at kuntento na ako sa aking buhay ngayon,” pahayag sa amin ni Amanda na isa sa mga tumutulong ngayon kay Vida Verde.
Para sa kaalaman ng lahat, si Vida Verde na sumikat noon sa mga pelikulang Nene, Iskandalosa at Mainit na Magdamag ay dinapuan ng maraming sakit na siyang dahilan para matanggalan ito ng boobs at magkaroon ng ovary cancer.
“Ako naman kasi, Kuya Morly, minahal ko ang mga perang pinaghirapan ko noon at hindi ko ito dinala kung saan-saan. Isa pa, talaga sigurong mahal ako nu’ng nasa Itaas dahil binigyan niya ako ng husband na bukod sa mabait na, ubod pa ng mapagmahal.”
Sinabi ni Amanda na wala na sa isipan niya ang bumalik showbiz, pero kung minsan ay hinahanap-hanap daw niya ang masaya at makulay na mundo ng showbizlandia. “Sa ngayon ay tahimik na ang buhay ko at wala na akong mahihiling pa.”
Tulad ni Amanda, si Mike Magat na isa ring sexy actor na matagal na ring wala sa showbiz ang nagsabing miss niya ang ilaw ng camera. Pero mas masaya na siya ngayon sa pribado niyang buhay, kung saan matapos siyang magtrabaho sa Japan nang kung ilan taon, nakapag-ipon siya at ngayon ay nagbi-business na lang.
“Malaki ang kita rito, kasi mamahaling mga bags at sasakyan ang mga binebenta ko. Pero siyempre, masaya sa showbiz. Kung may kukuha sa akin, why not, ‘di ba?” sabi ni Mike.
Sina Amanda at Mike ay isang magandang halimbaha ng mga sexy stars na nawala man sa showbiz, hindi naman naging pariwara ang buhay. Tsuk!
MARIING ITINANGGI NI John Estrada ang akusasyong mayabang at feeling sikat na siya ngayon sa Channel 5. Ayon kay John, nagugulat nga siya kung bakit may mga lumalabas na balitang nagpi-primadonna na siya sa set ng mga programang pinagbibidahan niya sa Kapatid Newtwork. “Hindi ko alam yata iyan,” sabi ni John.
Marami kasi ang nagsasabing hindi na raw ngayon madaling kausapin si John. Marami raw itong drama sa buhay bago magsalita, na pinatotohanan ng aming source. Maraming beses na raw niyang nakita itong si John na “nagmamaldito” kapag may mga reporter na nag-a-ask ng interbyu.
Sa kabilang banda, happy si John ngayong kumpirmadong sa Channel 5 na muling mapapanood ang kanyang kaibigan na si Willie Revillame. Ayon sa aming source, tiyak na “kakabahan” ang Eat… Bulaga! at ang Pilipinas Win na Win sa format nang bagong show ni Willie.
“Masyadong madugo ang budget ng show ni Willie, nakakalula ang mga ipamimigay niyang prizes sa mga contestant,” sabi pa ng aming source.
Pero ang tanong: May power at appeal pa ba ngayon si Willie sa mga manonood. ‘Yun ang aabangan. Tsuk!
HINDI KINAKABAHAN SI Marian Rivera sa kung anumang demandang ihahain sa kanya ng kampo ni Bela Padilla. Una at higit sa lahat, malinis ang kunsensiya ng aktres na hindi niya minaltrato ang baguhang aktres.
“Actually, sa totoo lang, obvious na ginagamit ng Bela na iyan sina Marian at Dingdong Dantes para pag-usapan. Kasi sino ba siya noong hindi pa nali-link ang pangalan niya kay Dingdong? E, never heard naman ang babaeng iyan sa showbiz, ‘di ba?” sabi iyon ng aming source.
Sakabilang banda, tuloy pa rin ang “panggagamit” ng kampo ni Bela kay Marian, dahil bukod sa demanda ay kumukuha pa raw si Claire dela Fuente (manager ni Bela) ng ilang kasamahan namin sa panulat para maging tagapagtanggol ni Bela sa laban, na ikinatataas lang ng aming kilay.
Hindi kami close ni Marian at lalong hindi namin kilala pa nang personal si Bela. Pero sa tagal namin sa showbiz, hindi na bago sa amin ang ganitong eksena. Tiyak namin na kaya lumalaki ang isyu ay may personal agenda si Bela para lalo siyang mapag-usapan. Iyan po ang personal naming opinion lang. Humpt!
More Luck
by Morly Alinio
