SA MGA UMAANGKIN at umaako sa mga blind items namin, ‘wag. Kung naniniwala kayong hindi o imposibleng gawin ng inyong idolo ang tinutukoy sa blind item, definitely, hindi siya ‘yon, kaya dapat n’yo nang ipanatag ang loob n’yo.
Pero kung ipagpipilitan n’yo pa ring siya ‘yong tinutukoy namin, aba’y wala na kaming magagawa. Ang kukulit ninyo, eh. Eh, ‘di sila na ‘yon, according to your paniniwala.
Wala namang binabanggit na pangalan, ipagpipilitan n’yo? Eh, pa’no na ‘yung totoong may-ari ng blind item kung aakuin n’yo?
O, siya, bato-bato sa langit, ang tamaan, dyukol.
ABA, ANG AMING Twitter friend na si Juliana Palermo ay buntis na ng 4 months and one week sa kanyang boyfriend na taga-New Zealand.
Ang alam namin, si July ay sa Hong Kong ngayon naka-base, ‘yan ang nababasa namin sa kanyang mga updates.
Anyway, congrats kay Juliana. Pareho na silang madir ng friend niyang si Diana Zubiri.
Ang pagkakaroon ng anak ay isang blessing. Hindi dapat ‘yan itago, bagkus dapat ipagmalaki, ‘di ba?
HINDI KO ALAM kung totoo itong itinatanong sa amin ng mga followers namin. Totoo bang gagawa ng movie with Jacky Chan si Kim Chiu?
If true, bongga! Feeling namin, mas ito ang totoong box-office kesa sa kanilang ‘Til My Heartaches End ni Gerald Anderson.
Ayon nga sa isang insider, hindi kalakasan ang tatlong tambalang pelikula ng Kimerald.
Nakaapekto kaya ang pagkaka-link ni Gerald kay Bea?
AND SPEAKING OF Gerald, nagpainterbyu na nga ito sa mga TV crew, hindi naman maintindihan ang sagot. Kung ipinaliwanag, hindi rin naman maliwanag.
Split na sila ni Bea? Baket, nag-on ba sila?
Naguguluhan din si Gerald. Hindi na raw niya maintindihan ang mga tao kung ano ang totoo.
Ang totoo naman, alam ni Gerald ang totoo, ayaw lang niyang magpakatotoo.
Kaya masisisi ba niya ang mga tao kung sa susunod niyang pag-iyak sa TV eh, hindi na siya paniwalaan?
Be man enough to face the consequences of what you did.
(Tama ba’ng Ingles ko o Tagalugin ko na lang? Ha-ha-ha!)
BIRTHDAY KAHAPON NI Ai-Ai delas Alas, pero kahit birthday ng lola n’yo, pukpukan pa rin ang rehearsals niya para sa major concert niya sa Araneta sa Nov. 19, ang “Akin Ang Tronong ‘To!”, kung saan ilang transformation ang kanyang gagawin.
“Sana, dumating lahat ang mga nagmamahal sa akin para naman tulungan akong punuin ang Araneta Coliseum uli!”
Oo naman. Ikaw na ang Comedy Concert Queen, ‘di ba?
‘Wag n’yong kalilimutang makinig sa “Wow, Ang Showbiiz!” sa dwiz 882 sa inyong AM station at maririnig din sa www.dwiz882.com, 11-12nn.
Oh My G!
by Ogie Diaz
