MAS MAHALAGA para kay Pauleen Luna ang katahimikan niya ganu’n na rin ng kanyang mahal na pamilya. Kaya kung nang dahil lang sa isyung nag-uugnay sa kanilang dalawa ngayon ni Vic Sotto ay patuloy siyang pupukulin ng kung anu-anong intriga at panlalait, malamang na puwedeng mangyari na iwan na rin niya ang Eat, Bulaga, kung saan nga sila magkasama ng daddy nina Danica at Oyo Sotto.
Palagi na ngayong ikinukumpara si Pauleen sa dating karelasyon ni Vic na si Pia Guanio at iyon ay pupuwedeng maging dahilan para magkaroon ng ilangan factor ang dalawang aktres. Magulo rin ngayon ang mga tsika, dahil sa loob ng kanilang programa, kontrobersiyal ngayong pinag-uusapan ang diumano’y pagbubuntis ng EB Babe na si Zaida at nababanggit ang pangalan ni Bossing sa isyung umano’y nakabuntis sa magandang dancer ng show. Natatanong din si Pauleen tungkol sa kanyang reaksiyon sa nasabing isyu, kaya hirap siya ngayon sa mga dapat niyang sabihin dahil baka pagmulan pa iyon ng panibagong intriga.
Mayroong mga nagmamahal kay Pauleen na nasasaktan sa pagbibintang sa kanya, na mayroon daw ipinagagawang magarang bahay ang kanilang pamilya, at naisyuhan ang dalaga ng tsika na hinuhuthutan na niya si Vic. Papaano naman daw mangyayari iyon, samantalang may kaya naman ang pamilya ng magandang aktres, at maganda’t malaki ang kanilang bahay na paulit-ulit nilang ipinapagawa para mas lalo pang pagandahin? Kapag daw patuloy na inintriga si Pauleen, baka iwan nga nito ang EB, dahil nu’ng magkaintrigahan sila ni Kristine Hermosa sa bakuran ng ABS-CBN dahil kay Diether Ocampo, mas pinili niya ang umalis na lang sa Kapamilya Network, para matahimik, kaya nasa GMA-7 siya ngayon.
ALAM NI Congresswoman Lucy Torres-Gomez na disenteng babae si Dawn Zulueta, kaya sa dami ng mga babaeng pupuwede niyang pagselosan at ang iba pa nga ay patuloy na nagpaparamdam sa husband niya, wala siyang nararamdamang anumang hindi maganda para leading lady ni Goma sa teleseryeng Walang Hanggan. Alam din kasi ni Lucy na katulad nila ni Richard ay masaya rin ang pagsasama nina Dawn at ng kanyang husband na si Congressman Anton Lagdameo.
Kahit nga si Richard ay tuwang-tuwa kay Lucy, dahil aliw na aliw daw ang kanyang wife sa tambalan nila ni Dawn. Tsikadora raw si Lucy at kapag hinihingan ng reaksiyon sa tambalang Dawn at Goma, paulit-ulit nitong ikinukuwento sa mga tao, na nu’ng wala pa siya sa showbiz at nagsisimula pa lang siyang maging commercial model, fan na talaga siya ng dating magkarelasyon, sa mga napapanood niyang pelikulang ginawa noon ng dalawa sa bakuran ng Reyna Films ni Armida Seguion-Reyna.
Prangka pero hindi mayabang si Richard. Na talaga namang kahit kasal na sila noon ni Lucy, marami pa ring mga babae ang nagpaparamdam sa kanya at tuksong lumalapit. Pero napakalaki rin ng kanyang respeto kay Lucy, at bilang asawa ay saludo siya sa panganga-laga nito sa kani-lang kasal. Sobrang maamo at maganda raw ang mukha ng kanyang wife. Pero hindi puwedeng kuwestiyunin ang pagiging palaban ni Congresswoman kapag ang sarili nitong pamilya ang kinanti ng ibang tao o ng mga babaeng pinagnanasaan pa rin ang matangkad na aktor.
ChorBA!
by Melchor Bautista
