PATI PALA SI KC Concepcion ay naging biktima rin daw ng kamalditahan ni Mariel Rodriguez. Nang mag-guest kasi ito sa Simply KC ay super happy ito. Magiliw siyang nakitungo sa dalaga at talagang naging maganda naman ang kinahinatnan ng kanilang interview.
‘Eto na ang siste. Pagkatapos ng episode, nagbubusa raw itong si Mariel habang naglalakad sa hallway ng ABS-CBN.
“Ginagaya niya ako. Ginagaya niya ang hosting style ko!” ‘Yan daw ang tili ni Mariel.
Ang nakakaloka, narinig pala ng production assistant ni KC ang mga pinagsasabi ni Mariel at pinarating ito sa dalaga. Siyempre, sumama ang loob ng anak ni Mega sa dyowa ni Robin Padilla.
May narinig pa kaming kuwento na kinukuwestyon daw ni Mariel kung bakit binigyan si KC ng solo talk show gayong mas magaling naman siyang mag-host kaysa rito.
Kaloka pala itong si Mariel. Hanggang ngayon hindi pa nagbabago.
NAKAKATUWA ITONG SI Joshua Dionisio. Wala kasi siyang reklamo kahit na siya ngayon ang tumatayong breadwinner ng pamilya niya.
Nagpapasalamat si Joshua dahil sunud-sunod ang project niya sa GMA-7. Kasama nga siya sa Sunday afternoon series na Reel Love Presents Tween Hearts.
“Ako po kasi ang breadwinner ng pamilya. Wala pong trabaho si Papa dahil din po sa akin. Sa akin, wala pong problema ‘yon. Masaya naman po talaga ako na na bata pa lang ako ay natutulungan ko na sila,” esplika ni Joshua.
Napansin ng binatilyo na hindi nalalayo sa character niya sa Tween Hearts ang role niya dati sa First Time.
“Ang problema lang po kasi, characters. Parang same din kasi noong First Time, masungit din, suplado,” sabi ng young actor.
Pero confident si Joshua na magugustuhan ito ng kanyang fans.
“Mas magugustuhan ng tao ito kasi mas marami na, mas masaya ito, mas maganda ang timeslot, Sunday at walang pasok ang mga tao.”
At kahit na maraming kasama sa show tulad ng mga baguhang sina Joyce Ching, Kristoffer Martin, Lexi Fernandez, Louise de los Reyes and Derek Monasterio ay hindi insecure ang binatilyo.
“Masaya rin naman ako dahil magkasama kaming lahat, at least hati-hati kami sa obligation. Lahat kami may mga parang forte. “Hindi ko naman po sila itinuturing na kumpetisyon. Siyempre, same company kami kaya paano kami maglalaban-laban.”
HANGGANG NGAYON AY palaisipan pa sa marami kung bakit natsitsismis na hiwalay na sina Jackielou Blanco at Ricky Davao.
Well, ang alam namin, nagkaroon ng tension sa pagitan ng dalawa nang ma-interview si Jackie ng isang writer. Pina-rate kay Jackie ang asawa niyang si Ricky from a scale of 1 to 10 bilang asawa. Ang ibinigay ni Jackie ay 8.
Dito na nagsimula ang tampuhan nila. Kinantiyawan kasi ng mga anak nila si Ricky dahil sa 8 rating na ibinigay ng kanyang dyowa. Doon na nagsimulang hindi magkibuan ang dalawa.
Kung tutuusin, ang bale lumalabas na naging sanhi ng alitan ng dalawa ay ang simpleng tanong ng writer. Ewan ko ba naman kasi kung bakit ang hilig-hilig magpa-rate ng writer na ito kapag nag-i-interview.
Lex Chika
by Alex Valentine Brosas
