MAY EPEKTO NA talaga ang pagitan na nalikha ng hindi kagandahang PR ngayon ni KC Concepcion sa mga press people. Tinanong ko ang isang reporter na malapit sa programang The Buzz kung totoong mahigpit na ngayon ang programa sa pagpapapasok ng press sa studio. Dati kasi napaka-friendly ng show sa press. Hayun, ngayon nga raw ay hindi ka na basta makapapasok doon, kundi magpapa-schedule ka muna bago ang mismong araw ng pag-ere ng show.
Susme! Ako, bilang reporter ay suking dumadalaw d’yan sa studio ng The Buzz. Pero kung dahil lang din naman kay KC ay mahihirapan akong pumasok sa studio nila, hindi bale na lang. Bilang respeto, ang mga manunulat ay pumapasyal d’yan sa studio, dahil napakaraming kaibigan na nagmamahal sa pangunahing host na si Kuya Boy Abunda. Kahit sikat si Kris Aquino na dating parte ng show, hindi siya mabango sa press people na dumadalaw roon, dahil si Kristeta ay may sariling mundo, at namimili lang siya ng kakausapin. Nagkataon lang na si KC ang natsika ng press, na humantong pa sa hindi magandang sitwasyon ngayon.
Sa karanasan ko, aliw akong pumunta sa The Buzz. Bilang ganti iyon, na nu’ng panahong nagkaroon ako ng malubhang karamdaman, eight years ago, nakakatanggap ako ng tulong mula kay Kuya Boy kahit hindi naman niya ako kilala nu’ng mga panahong iyon. Magpaturo muna si KC sa kanyang daddy na si Gabby Concepcion na napakagaling ng PR. KC, ang daddy mo, kesehodang pangit na intriga ay nakakayang pagtiisan at makipagtratuhan nang maayos sa press.
NAPAPANSIN NA TALAGA ang kagandahan at kaseksihan ng pamangkin ni Alma Moreno na si Kristel Moreno. Kahit nga ako, nu’ng minsang magkasabay kami ni Kristel sa dressing room ng Juicy ng TV5 ay sobrang nagandahan ako sa kanyang mukha, kaya paulit-ulit ko siyang pinagmamasdan. Hindi ko pa alam noon, na siya si Kristel. Kasi nga, wala pa siyang make-up ay sobrang ganda na niya, kaya minarkahan ko na siya pala iyon.
Dahil maganda ang mukha ni Kristel, kaya naman nabibiktima na rin siya ng panggagamit. Kamakailan ay sumugod sa isang lugar d’yan sa Timog Ave. ang mga malalapit niyang kaibigan at mga nagmamalasakit sa kanyang movie career. Kasi ba naman, nadiskubre na nakapaskel ang malaki niyang litrato sa harapan ng isang massage parlor. Napansin ko na rin iyon, kaya nag-isip din ako kung bakit may picture siya roon, eh hindi naman siya masahista, ‘noh! Pupuwede ring isipin na baka friend ng family nila ang may-ari ng place kaya inee-endorse niya. Pero hindi pala, kaya umaksiyon na sila.
Ang ipinakiusap lang naman daw ng kampo ni Kristel du’n sa management ng massage parlor ay tanggalin ang picture niya, dahil kinukulit sila sa text at tawag sa telepono ng mga nakakakilala sa magandang young actress, kung bakit may picture siya du’n sa nasabing lugar na puntahan ng mga kalalakihan na nagpapamasahe?
ChorBA!
by Melchor Bautista
