NASA STUDIO KAMI ng Starstruck nu’ng kamakalawa ng gabi nang may lumapit sa amin na very reliable source para kumpirmahing nasa iisang condominium nga raw sina Manny Pacquiao at Krista Ranillo sa Los Angeles, California.
May nagkuwento kasing nakatira sa isang condo unit si Krista at meron din daw na isang unit doon si Manny pero magkaibang floor lang.
Kaya totoo nga siguro ang napabalitang nagkikita sila roon at malamang tuloy pa rin ang ano mang relasyon meron sila.
Kaya tinanong ito ng Startalk kay Jinkee Pacquiao pero itinatanggi niya ito. Meron daw silang bahay roon sa Amerika at ang pagkakaalam niya doon tumitigil ang kanyang asawa. Bakit pa raw ito kukuha ng isang condo unit?
Sabi naman ni Jinkee, makararating din naman sa kanya ‘yun kung totoo nga ito at hindi naman daw ito maililihim sa kanya. Pero sa ngayon, naniniwala siyang hindi ito gagawin ng asawa niya dahil maayos daw silang nagkausap at halos araw-araw ay may komunikasyon sila.
Puspusan daw ang training doon ni Manny at ang pagkakaalam niya, hindi ito gumagawa ng kalokohan. “Alam naman niya (Manny) kung ano ang mangyayari sa amin pagka-gagawin niya ulit ‘yung mga hindi karapat-dapat. So kailangan behave siya,” napapangiting pahayag ni Jinkee.
“Kailangang intindihin niya na hindi na puwedeng maulit ‘yung dati na parang pinagpiyestahan kami. Nagkaproblema kami. I’m sure hindi na niya uulitin ‘yun,” dagdag pa nito.
Sa kabila ng mga naglalabasang tsismis ay nandiyan si Jinkee na nagtatanggol sa kanyang asawa. Pero hindi naman daw siya nagbibingi-bingihan lang. Tiyak naman daw na makararating ito sa kanya kung may bahid nga ng katotohanan itong kumakalat na balita.
May galamay naman doon si Jinkee at sabi nga niya minsan ay nag-a-ala-Mike Enriquez daw siya na magaling na imbestigador. May mga galamay naman doon si Jinkee na siyang magpaparating nito sa kanya. Pero wala pa ngang ganu’ng balitang ipinararating sa kanya kaya buo ang tiwala ni Jinkee na walang ginagawang kalokohan ang kanyang asawa.
“Basta ang masasabi ko lang, okay kami. Nag-uusap kami everyday. Nagkakaintindihan kami.
“Basta kung meron lang manggulo, siguro ibang usapan na ‘yun kung manggugulo pa sila. Basta kami okay kami, masaya,” patuloy na pahayag ng tunay na Mrs. Pacquiao.
Nakunan din naman noon si Krista nang umalis ito pa-Amerika at sinabi lang niyang dadalawin daw niya roon ang pamilya niya at ang kapatid niyang inoperahan. Hindi naman daw siya magtatagal doon at babalik din siya agad dahil marami pa siyang commitments dito.
MALAPIT NA ANG finals ng Starstruck V at may announcement sila nu’ng nakaraang Linggo na sa halip na final 4 ang maglalaban sa darating na finals sa February 21 ay final 5 na raw dahil Starstruck V naman ito.
Kaya mahigpit na naman ang labanan pero anim na lang ngayon ang natira dahil natanggal na si Ian Batherson nu’ng kamakalawa at sa darating na Linggo ay isa pa uli ang matatanggal at dito malalaman kung babae o lalaki ang magpapaalam.
Pero mukhang mas matindi ang laban sa mga lalaking naiwan dahil pawang malalakas sila at mas maraming supporters.
Malakas ang kutob naming maiiwan sa Final 5 sina Rocco Nacino, Enzo Pineda, Steven Silva, Diva Montelaba at Sarah Labati.
Dalawa lang ang big winners pero matindi ang labanan kaya pakatutukan kung sino ang maiiwan dahil painit na nang painit ang labanan ng Starstruck V na magpa-finals sa February 21 na gaganapin sa Araneta Coliseum.
By Gorgy’s Park
