NAPAKAGANDA NAMAN TALAGA ni Kristine Hermosa. Classic ang kanyang ganda. Uso sa lahat ng panahon. Walang pagkupas.
Kahit itabi mo siya sa kanyang mga kasabayan, may kulapol man ng make-up o wala, ay lutang na lutang ang kagandahan ni Kristine. Magmumukhang mga dama lang ng reyna ang labanan.
Pero bakit nga ba palaging bida sa mga kuwento ng pagmamaldita si Kristine Hermosa? Kahit sino ang makausap mo, siguradong may kontribusyon sa kuwentuhan, dahil minsan-makalawa ay nakatrabaho na rin nila ang magandang aktres.
Sasabihin ng isa, “May sarling mundo ang babaeng ‘yun. May mga times na dumarating siya sa set na hindi kumikibo. Tapos na ang taping, hindi pa rin siya kumikibo.
“Nagbubuka lang siya ng bibig kapag take na, pero pagkatapos nu’n, balik na naman siya sa sarili niyang mundo. Mahirap ispilingin ang ugali ni Kristine.
“Kaya kami sa set, kapag ayaw niyang kumibo, ‘di hindi rin namin siya kinakausap! Panisan na lang kami ng laway, kung gusto niya! Bakit naman ako kakausap sa taong ayaw mamansin?
“Ang katwiran ko na lang, e, hindi naman siya ang may-ari ng production, pareho lang kaming artista, kaya ang karapatan niya, karapatan ko rin bilang artista!” madiing kuwento ng isa niyang kasamahang artista.
Ang kakuparan ay nadikit lang sa tinatawag na pagonang si Snooky Serna, pero ayon sa aming kausap ay mas makupad pa kay Snooky si Kristine, kung silang dalawa raw ang pagsasamahin sa isang proyekto ay siguradong aabutin ‘yun nang siyam-siyam bago matapos.
“Napakabagal niyang kumilos, marami siyang tsetse-buretse sa katawan, she doesn’t care kung maraming naghihintay sa kanya. At kahit siya ang cause of delay, hindi siya marunong manghingi ng sorry.
“Parang palagi siyang problemado, parang palagi siyang wala sa sarili, parang kanya lang talaga ang mundo at walang ibang naninirahan sa planetang ito kundi siya lang,” komento pang nakarating sa amin.
PERO NOON PA ‘yun. Kailan lang ay nakarating sa amin ang kuwento na iniupo nang seryosohan ni Direk Johnny Manahan si Kristine Hermosa para “rolyohan.”
Ayon sa aming source ay talagang kinausap nang masinsinan ng tagapamahala ng Star Magic ang magandang aktres para maging propesyonal, ayaw na raw makarinig pa ng kung anu-anong reklamo ni Mr. M, kaya kinausap nito nang seryosohan ang isa sa mga pambato nilang talents.
“Nangyari ‘yun bago nag-start ang taping ng Dahil May Isang Ikaw, balik-tambalan nila ‘yun ni Jericho Rosales, sinabi sa kanya ni Mr. M na ayaw na niyang makarinig pa ng problema mula sa production.
“Nagre-report kasi ang bawat production sa Star Magic, through the report, nalalaman nila kung kanino nagkakaroon ng problema sa taping. So far, okey naman ang mga nakararating na report sa Star Magic.
“Maayos naman si Kristine, hindi siya nagiging cause of delay, walang nasasagupang problema ang production staff sa kanya. ‘Yun ang maganda sa Star Magic, kahit datihan na o baguhan pa lang ang mga artista nila, talagang pantay-pantay ang tingin ni Direk Johnny.
“Ang pinoproblema ng production, pahinga muna, ang walang ibinibigay na problema, ‘yun ang binibigyan ng mas maraming projects,” ayon pa sa aming source.
Nasisilip din namin paminsan-minsan ang bagong teleserye ni Kristine Hermosa at sa totoo lang, klasiko ang kanyang ganda, bulag na lang ang magsasabing hindi siya maituturing na isa sa pinakamagagandang mukha sa lokal na aliwan ngayon.
Cristy Per Minute
by Cristy Fermin
