SI LOVI POE mismo ang nagsalita na kung nabubuhay pa raw sa ngayon ang amang si Fernando Poe, Jr., malamang ay matagal na siya nitong isinumpa sa kanyang mga pinaggagagawa. Tinitiyak daw nang dalaga na hindi magugustuhan ni The King ang desisyon niyang magpaseksi.
Ayon kay Lovi, maging sa ina niyang si Maria Lourdez Virginia Moran, hindi naging madali ang pagpayag para tuluyang pumalaot siya sa paghuhubad. Marami umanong kundisyones ang ina bago ito sumang-ayon na kailangan na niyang magpaseksi.
Hindi naman daw bastos ang ginagawang pagpapaseksi ni Lovi. Hindi naman daw siya nagpapakita ng maseselang parte ng kanyang katawan. Karamihan umano sa kanyang mga pictorials or movie ay puro likod lang ang kanyang ipinakikita. Lumalabas lang daw na matapang, mapanukso at mapangahas ang kanyang pagpapaseksi ay dahil sa mga malikhaing anggulo ng mga kamera.
May pagmamalaking sinabi ni Lovi na kung anuman daw ang nakikita ng mga tao sa kanyang mga larawang naglalabasan ay walang daya iyon. Lahat ng parte ng kanyang katawan ay original, pero wala siyang nakikitang masama kung ang isang tao ay magparetoke lalo pa at kailangan ito sa kanyang work.
Sa kabilang banda, inamin ni Lovi na dumalaw siya sa dati niyang boyfriend na si Ronald Singson sa Hong Kong, pero ayaw na niyang idetalye pa kung ano ang kanilang napag-usapan. Basta ang mahalaga raw, na-comfort niya kahit paano ang dating katipan.
Kaugnay nito, natawa lang ang aktres sa balitang selos na selos si Ronald kay Richard Gutierrez dahil balitang may lihim na relasyon daw ang aktres sa binata ni Annabelle Rama.
DEADMA AT HINDI raw nagsalita si Angelica Panganiban sa tanong ni Gretchen Fullido ng Channel 2 kaugnay sa development ng relasyon nila ni Derek Ramsay sa presscon ng isang beauty product. Sumimangot lang daw ang aktres. “Loka nga kami kasi hindi naman ganu’n si Angelica dati. Kasi kahit imbiyerna ito noon, nagko-comment pa rin ito,” say ng isang segment producer.
Sa kabilang banda, hindi natin masisisi si Angelika kung hindi man siya magbigay-komento, dahil una ay obvious na iniiwasan nitong pag-usapan ang naging kontrobersiyal na usapin kay Derek Ramsey noon.
“Sana naman maunawaan nila si Angelica. At maging si Derek, kita mo naman hindi rin nagsasalita. Hayaan na lang sana natin sila sa kanilang pananahimik and besides mabait naman ang couple na iyan,” say ng aming source.
Ayon pa rin sa aming source, kung tutuusin daw ay nalulungkot si Derek at Angelica sa mga nangyayari. Gustuhin man daw ng mga ito na pagbigyan ang maraming kaibigan sa showbiz na makakuwentuhan, kaya lang ay hindi talaga puwede.
“Fair sina Angelica at Derek, kahit sa mga kaibigan nilang reporter, hindi rin sila nagpapa-interview, kasi nga may dahilan,” bitin na sabi pa ng aming kausap.
Sa totoo lang hindi man kami ganu’n ka-close kay Angelica at Derek, alam naming sooner ay magsasalita rin ito. Antayin na lang natin. Huwag maging atat. Tsuk!
IBANG KLASE PALA si Mommy Dionesia Pacquiao sa GenSan dahil ilang hakbang lang mula sa mala-palasyo nitong bahay ay may bonggang mini-grocery na siya.
“Ako ang nagma-manage nu’n. Bigay sa akin ni Manny ang business kong iyon, “ sabi ni Mommy Dionesia na hindi pala nakakalabas ng bahay nang walang kasamang bodyguard.
“’Yun kasi ang bilin ni Manny, huwag akong aalis ng bahay kapag walang kasamang mga bodyguards.” Take note, bodyguards! Marami!
Halos lahat pala ng business sa GenSan ay pag-aari ni Manny. Meron siyang gasoline station, bar, restaurant, boutique, games and leisure house, water station at kung anu-ano pa.
“Hay, hindi ko na talaga mabilang ang dami ng business ng anak ko. Pero hindi naman siya nagkakaroon ng problema dahil may kanya-kanyang tauhan silang nagbabantay.
Sa kabilang banda, mula nang pumutok ang balitang namimigay si Manny ng pahabay sa mga taga-GenSan at Sarangani, halos pila-pila ang mga taong dumarating sa bahay ng Pambansang Kamao. Nakatakda kasing mamigay ng bahay si Manny, katulong ang Habitat, kung saan ayon kay Pacman ay ekta-ektaryang lupain ang nakatakda niyang ipamigay sa mga nangangailangang kababayan.
Si Manny ay larawan nang mabuting anak, kaibigan, at good Samaritan, kaya lang pagdating sa hosting ng sariling programa… ay, huwag na lang!
More Luck
by Morly Alinio
