NANG NAKAUSAP NAMIN sa Startalk ang dating asawa ni Robin Padilla na si Liezel Sicangco, mukhang palaban na ito at parang gustung-gusto na nitong magsalita laban kay Robin.
Mabuti’t pinipigilan muna ito ng mga staff namin dahil baka kung anu-ano ang masabi, hindi naman namin makunan ng sagot si Robin.
Ang gusto lang naman ni Liezel ay makuha ang bunsong anak nilang si Alih dahil sa sobrang nag-aalala na siya nang nabalitaan nitong nagkasakit si Alih at inoperahan ito sa appendix.
Ang huling balita naman niya ay nagkasakit din daw ang panganay niyang si Queenie at na-hospital din ito pero alam niyang kaya na ni Queenie na pangalagaan ang sarili niya.
Ang concern lang niya talaga ay si Alih dahil 10 years old pa lang ito at sa tingin daw niya kailangang mabantayan nang mabuti lalo na ang pag-aaral nito.
Matindi ang mga pahayag ni Liezel na takot daw si Alih kay Robin kaya tinitiis nito kapag may naramdaman siyang sakit.
Ang lagi raw sinasabi ni Robin, “You’re a man, you’re not gay!” kaya dapat na hindi ito nagpapakita ng kahinaan.
Siyempre nag-react du’n si Robin dahil hindi naman daw totoo ‘yun. Una, hindi naman daw niya sasabihin ‘yung “gay” dahil may kapatid siyang bading. Ang sinasabi lang daw niya ay “you’re not a girl” hindi “gay”.
Pero ayaw muna ni Robin na salubungin ang galit ni Liezel dahil hindi sila magkakasundo.
Ang nakarating naman sa akin, ibibigay naman daw ni Robin si Alih kay Liezel pero huwag daw muna ngayon dahil nag-aaral pa ito. Puwedeng tapusin daw muna nito ang pag-aaral niya.
Sabi naman ni Liezel, hindi na nag-aaral itong si Alih dahil sa kasasama kung saan magpunta si Robin, na itinatanggi naman ito ng kampo ng aktor.
Mukhang marami pang gustong ibunyag si Liezel pero marami pa raw siyang iipuning ebidensiya bago siya magsalita uli.
Pagkatapos niyang magsalita sa Startalk, mananahimik na lang daw muna siya dahil mabuting respetuhin na lang daw ang pananahimik ng dating asawa, dahil nasa Ramadan ito. Pero hintayin na lang daw pagkatapos ng Ramadan, ilalabas niya ang lahat na mga ebidensiyang hawak niya, dahil marami raw siyang dapat na ipaglaban kay Robin.
Naku! Mukhang lalala pa ang gulong ito kaya siguro dapat na ayusin ito ni Robin nang maayos para manahimik na si Liezel. Ibigay na lang niya siguro ang anak niyang si Alih dahil sa ganu’n pa kamurang edad, dapat namang nasa Nanay niya muna ito.
MAGSISIMULA NA NGAYONG linggo ang shooting ng Agimat ni Enteng na pagbibidahan nina Sen. Bong Revilla at Vic Sotto.
Ipinakilala na ng GMA-7 ang makaka-partner ni Bossing Vic na gaganap bilang Faye na asawa ni Enteng Kabisote, pero ang kay Sen. Bong naman wala pang napagdesisyunan.
Ang unang balita, si Toni Gonzaga raw pero mukhang wala pang katiyakan iyan dahil may kontrata si Toni sa Star Cinema.
May mga ibang baguhang artista na pinagpilian pero hindi ko naman type. Pero ang GMA Films naman daw ang bahala riyan, kaya hindi na ito pinakikialaman ni Bong.
Sabi naman niya, hindi na importante sa kanya kung sino ang ka-partner niya. Masaya na raw siya na magsasama sila ni Vic sa isang malaking pelikula at pang-MMFF pa, ‘di ba? Bongga na ‘yun!
Mga Mata ni Lolita
by Lolit Solis
