SINCE MAY ELECTION fever pa rin, isa sa pinag-uusapan ay ang mga bagong halal sa congress na magiging star-studded na ito.
Pinoroklama na bilang congresswoman ng lone district of Bacoor si Lani Mercado nu’ng nakaraang Martes ng gabi at si Lucy Torres-Gomez naman ay kahapon ng umaga kaya malaki ang pasasalamat nito sa mga supporters niya na sa Ormoc dahil talagang binantayan daw siya sa mga masasamang balak ng mga kalaban nito.
Pero naiproklama na nga si Lucy kaya ewan ko kung meron pang reklamong isasampa ang mga kalaban nito.
Parang nakahinga na rin daw nang maluwag si Lucy dahil sa hirap na pinagdaanan ni Richard Gomez kaya siya na ang ipinalit pagkatapos ma-disqualify ang kanyang asawa.
Si Lani naman, ganu’n din ang pakiramdam dahil sa hirap din ng pinagdaanan nito. Ang dami nga raw paninirang ibinato sa kanya para lang matalo ito pero mabuti’t hindi naman ito pinaniwalaan ng mga taga-Cavite dahil wagi naman ito at lehitimo na nga siyang congresswoman ng lone distric ng Bacoor.
Ngayon ay pinag-uusapan na magiging star-studded ang kongreso dahil bukod kina Lucy at Lani, pasok din sina Madame Imelda Marcos, Manny Pacquiao, Dan Fernandez at ilan pang celebrities.
Pinag-uusapan na rin ng mga bakla kung sino kaya ang may pinaka-bonggang suot sa pagbubukas ng kongreso at kung sino ang pinakamaganda.
Natawa si Lani nang tinanong namin ito dahil wala pa raw sa isip niya kung ano ang isusuot nito. Marami pa raw siyang iniisip sa ngayon at aayusin kaya hindi pa raw niya alam kung ano ang isusuot nito. Pero hula na namin, tiyak na si Paul Cabral ang gagawa ng gown ni Lani.
Ganu’ndin ang reaksiyon ni Lucy nang tinanong namin kung napaghandaan na ba niya ang isusuot nito sa first day niya sa Kongreso. “Kayo talagang mga bakla kayo! Ha-ha-ha! Hindi ko pa naisip ‘yun,” natatawang sagot sa amin ni Lucy.
Si Lani ay lie-low daw muna sa showbiz dahil mahirap daw sa kanya na isabay ang trabaho sa showbiz kung meron din siyang trabaho sa kongreso at kailangan naman daw niyang may panahon pa siya para sa kanyang pamilya.
Gusto naman ni Lani na hindi niya mapapabayaan ang kanyang mga anak at si Sen. Bong kahit nasa Kongreso siya. Kaya maisasantabi raw muna ang showbiz para maharap naman daw niya ang bago niyang responsibilidad para sa mga constituents sa Bacoor.
Si Lucy naman ay kaya raw niyang ipagpatuloy ang trabaho niya sa showbiz dahil kaya naman daw ng schedule niya.
May mga regular show pa si Lucy na hindi naman daw niya puwedeng iwan kaya tuloy pa rin daw siya kasabay ng bago niyang trabaho sa kongreso.
Si Alfred Vargas naman na wagi bilang konsehal sa district 2 ng QC, gusto naman daw niyang bumalik sa showbiz pero paghahandaan daw muna ang kanyang katawan dahil medyo lumusog siya ngayon sa ilang buwan niyang pangangampanya.
Malamang sa buwan ng July ay payat na raw siya para bumalik naman daw ang pagiging hunk niya bago siya isabak sa trabaho.
Pero hati na raw ang schedule niya sa showbiz at sa kanyang trabaho sa district 2 ng Quezon City.
Si Christopher de Leon naman na wagi bilang Board Member ng Batangas ay gusto na ring bumalik sa trabaho dahil kahit meron na siyang bagong trabaho sa naturang lalawigan, hinahanap pa rin naman daw niya ang trabaho bilang artista.
Hangad naman ng mga artistang pulitiko na makapagsilbi. Pero siyempre, hindi naman mawawala sa kanila ang pagiging artista dahil diyan naman sila kumikita at hindi sa pagiging pulitiko. Sana nga po!
By Gorgy’s Park
