NASA tamang edad na si Luis Manzano para magpakasal. Pero para sa kanya, wala pa siya sa tamang panahon para pumasok sa larangan ng pulitika, na palaging inuusisa sa kanya ng marami.
Hindi nababakante ang kanyang lovelife, dahil magkakasunod lang sina Angel Locsin, Jennylyn Mercado, at Jessy Mendiola na kanyang mga naging karelasyon. Pero kahit siya, hindi pa niya nararamdaman sa ngayon ang pagmamadali para mag-asawa.
“‘Yang pag-aasawa, darating din talaga ‘yan kapag ‘yon na talaga ang hinihintay mong panahon. Ganu’n din sa pulitika, hindi puwedeng basta ilalagay mo na lang doon ang sarili mo,” katuwiran ni Luis.
Masipag si Luis sa kanyang career. Mayroon din siyang mga pinasukang negosyo. Si Jessy talaga ang kanyang inspirasyon sa ngayon. Pero wala pa ring posibilidad na magkaroon ng unang apo ang kanyang mommy na si Congresswoman Vilma Santos-Recto.
“Kung hihingi na si Mommy sa akin ng apo, sasabihin ko’y si Ryan Christian (Recto) na lang muna ang gumawa ng baby. Respeto na lang sa akin bilang panganay, paunahin na lang si Ryan na gumawa ng baby para magkaroon ng apo si Mommy, ‘di ba? Ganu’n na lang muna sa ngayon,” pagbibiro ni Luis.
ChorBA!
by Melchor Bautista
