TAOS-PUSO ANG pasasalamat ni Maja Salvador na napasama siya sa cast ng May Bukas Pa ni Santino. Nanumbalik uli ang sigla ng kanyang showbiz career, kaliwa’t kanan ang kanyang commerical endorsements sa tulong ni Bro.
“Iba ‘yung impact ng mga tao kay Santino, iba ‘yung pagtanggap. Ang dami talagang naniniwala kay Santino lalo na ‘yung linya niya, ‘Sabi nga ni Bro, magtiwala ka lang….’ Matindi ang dating sa mga tao, hindi tayo dapat mawalan ng pag-asa, maraming naniniwala sa show na ito. Hindi niya tayo pinababayaan, hindi lang sa show namin, maging sa personal nating buhay. At saka, ‘yung blessing na ibinibigay sa akin ni Bro, panalong-panalo,” pagmamalaking wika ng dalaga.
Kuwento ni Maja, “Ngayon nga, maganda na ang takbo ng aming pamumuhay. Nabibili ko ang mga pangangilangan ng pamilya ko. Naisama ko na rin sila sa States at ipinasyal ko sila. Ang sarap ng feeling kapag nakikita mong happy ang family mo, nakakawala ng pagod. Sila naman kasi ang priority ko, kaya ako nagsisikap para mabigyan sila ng magandang buhay.”
Sa tulong ni Bro, may bagong teleseryeng gagawin si Maja na siya ang bida. “Nakaka-pressure, nakakakaba dahil mahirap gumawa ng soap na ikaw ang bida. Hindi ko lang alam kung pang-hapon or pang-primetime. Makakasama ko sina Jason Abalos, Coco Martin at Alessandra de Rossi. Maganda ‘yung istorya, iba ‘yung mga character namin dito, panalo talaga! Ibang Maja ang mapapanood ninyo na palaban, grabeng magmahal na gagawin ang lahat maging happy lang ‘yung family niya,” excited na kuwento ni Maja.
Kumusta na kayo ni Carlo? “May communication naman kami pero hindi na ganoon tulad ng dati. Nagte- text, tawag, dahil pareho naman kaming busy sa trabaho. At saka, hindi ko na nabibigyan ng oras, ganu’n. Hindi talaga puwedeng pagsabayin lalo pa ngayong magsisimula na kaming mag-taping ng bago kong soap. Nag-uusap naman kami, in fairness sa kanya, naiintindihan naman niya dahil artista rin siya.”
Hindi ipinagkaila ni Maja hanggang ngayon may pitak pa rin sa puso niya si Carlo. “Oo naman, minahal… importanteng tao naman si Carlo sa akin. ‘Yung relationship naman namin, ‘yung nand’yan siya, text me or call me. Kung sakaling manligaw siya ng iba, okey lang. Wala naman kaming relasyon, wala naman kaming commitment sa isa’t isa so, bakit naman ako tututol. Kung mangyayari ‘yun, kasalanan ko, wala na tayong magagawa. Kasalanan ko, if ever dumating ‘yung panahon na ready na ako tapos wala na siya,” pahayag ng youngstar.
Ibig kayang sabihin ni Maja nawawala na ‘yung communication nila ni Carlo?“Yeah, siguro three months na ngayon na hindi siya pumapasyal sa bahay. Siyempre, nalulungkot ako pero wala tayong magagawa. ‘Yun nga kasi, kailangan kong unahin ang trabaho ko. Sabi ko nga, siguro ‘yung manliligaw kaya nauudlot ‘yung panliligaw nila ay dahil sa dami ng trabaho ko. Kapag mayroon ka namang free time, ‘yung oras mo naman para sa family mo. Hindi naman puwede kung mag-i-invite sila, isasama mo ‘yung family mo. Siyempre, ‘yung manliligaw mo gusto naman nilang kayong dalawa lang para may moment kayo together,” sambit niya.
AYAW Paawat!
by Eddie Littlefield
