MATAPOS MAILAGAY ni Carl ang pasta ng 9 year-old na babaeng pasyente, automatic n’yang sinenyasan si Arianne na i-light cure ito. Nagulat si Carl nu’ng biglang mabitawan ni Arianne ang pang-light cure at napahakbang ito patalikod habang nag-aapuhap ng mahahawakan. Inalalayan n’ya si Arianne. “Nahihilo ako,” sabi ni Arianne.
Dahil suking pasyente na nila maging ang parents ng 9 year-old na nila-light cure, ang mga ito na ang nagdala kay Arianne sa ospital habang tinatapos ni Carl ang ngipin ng bata. Mabuti na lamang at huling pasyente na ang bata sa araw na ‘yon. Maagang nagsara ng clinic si Carl at minarapat na puntahan sa ospital si Arianne. Nguni’t tinext na s’ya nito, ok na raw. Nahilo lang daw dahil sa sobrang init ng panahon. Sinabihan ni Carl si Arianne na magpahinga at h’wag nang pumasok sa clinic kinabukasan. Nagpasalamat naman si Arianne.
Tamang-tama, pagkatapos ng text ni Arianne, dumating naman ang text ni Rand. Tinatanong nito si Carl kung p’wede ba silang magkita. Dahil wala naman talagang gagawin, pumayag si Carl. Sa isang coffee shop sa Trinoma sila nagkita ni Rand.
“Dahil ikaw ang nagyaya, ikaw ang taya,” biro ni Carl kay Rand.
“Sige,” seryosong sagot ni Rand.
“O ba’t seryoso ka?” tanong ni Carl.
Ilang saglit munang nanahimik si Rand bago ito nakapagsalita. “Si Ritz.”
“‘Yung kahapon?”
“Alam mo bang may gusto sa ‘yo?”
Tumawa si Carl. Tawang may hinanakit, tawang nagtatago ng lungkot at panghihinayang. “Sinamahan ko nga para puntahan ‘yung babae n’ya, e. Sabi mo put on lang ‘yung pagiging lesbiyana. Totoo pala.”
“Narinig kong kausap ‘yung isang housemate naming babae,” pauna ni Rand. “Pinag-uusapan nga ‘yung nangyari kahapon.”
“Baka naghahanap ng mapaghihingahan ng sama ng loob. Friends lang daw sila sabi nu’ng babae. Ayun, magpapakasal na du’n sa boyfriend.”
“Palabas lang ‘yon.”
Nagulat si Carl. “Ano’ng palabas?”
“Narinig ko sila, nagtatawanan,” sabi ni Rand. “Tawa nang tawa habang pinag-uusapan kung paano ka niloko ni Ritz kahapon.”
“Niloko?”
“Oo. Niloko,” pagdidiin ni Carl. “Gano’n pala ang ginagawa n’ya ‘pag may nagkakagusto sa kanya. Kukuntsabahin ang isang kabigan n’yang babae tapos gagawa ng eksena sa harapan ng lalaki na kunwari lesbiyana s’ya.”
Nabuhayan ng loob si Carl. “Hindi totoo lahat ‘yon?”
“Hindi,” paniniyak ni Rand. “Test lang para makita kung hahabulin pa rin ba s’ya ng lalaki. At ‘eto ka.”
“Ano?”
“‘Pag hindi n’ya talaga gusto ang lalaki, diretsahang basted na agad.”
“So, nagpapalabas lang s’ya ‘pag gusto n’ya ang lalaki?”
“Gano’n na nga.”
Gusto sanang maglululundag ni Carl. Kung p’wede lang s’yang mag-cart wheel sa coffee shop, ginawa na n’ya. Gusto n’yang sumigaw, hilingin sa langit na umulan para makasayaw at makakanta s’ya sa ilalim ng ulan. “Lekat,” naisip ni Carl. “Para naman akong high school sa nararamdaman ko.”
“O,” pansin ni Rand. “Ganda ng ngiti mo ha?”
“Natatawa lang ako.”
“Kinikilig ka, e.”
Hindi makaimik si Carl. Hindi rin mapawi ang ngiti n’ya sa kanyang mukha.
“Kung ako sa ‘yo, popormahan ko na ‘yon,” payo ni Rand.
“Teka, ang bilis naman.”
“Ano pa’ng mabilis do’n?” gulat na tanong ni Rand. “Wala na kayo sa high school. Kung sa iba lang, baka matagal nang naging kayo.”
“E, siempre, alam mo naman,” paliwanag ni Carl. “Matanda na nga tayo. Gusto ko, kung sakali man, e ‘yung babaeng tuluy-tuloy na sa altar. Gusto ko na ring magkapamilya. Pine-pressure na rin ako nina Mommy at Daddy na bigyan na raw sila ng apo.”
“Ano pa nga’ng hinihintay mo?”
“Sige, aaminin ko, tutal obvious naman,” sabi ni Carl. “Malakas nga’ng tama ko du’n sa housemate mo. At oo, na-i-imagine ko na ring magiging kami at magkakatuluyan kami at magkakaanak. Mga tatlo, dalawang babae at isang lalaki.”
“Umabot na do’n ang imagination mo?” biro ni Rand.
“Kung kelan naman ako seryoso, saka ka nagbibiro, e.”
“Ang dami mo pang sinasabi. Kung talagang gusto mo, e ‘di ligawan mo na.”
“Natatakot ako.”
“Hindi ka mababasted, may gusto nga sa ‘yo.”
“Pa’no namang liligawan ‘yang babaeng ‘yan na may test pang nalalaman, aber?”
Natahimik si Rand. Ilang sandali rin s’yang nag-isip. “May punto ka,” sabi n’ya. “‘Pag may mga tests pang nalalaman ang babae, ibig sabihin ang daming baggage. Mahirap nga namang manligaw sa babaeng may baggage. Sakit ng ulo ‘yon.”
‘Di inaasahan ni Carl ang susunod na sasabihin ni Rand.
“Kung maghanap ka na lang kaya ng iba?”
(Itutuloy)
