MARIING ITINANGGI NG pinakasikat na Sexbomb dancer na si Rochelle Pangilinan nang makausap namin ito sa 24th Star Awards for TV last November 13, kung saan isa ito sa performer, ang tsikang wala na siya sa kuwadra ng kanyang manager na si Ms. Joy Cancio, ang CEO/President ng Focus E.
Tsika ni Rochelle, hindi nito lubos-maisip kung saan nanggaling ang malisyosong balita dahil hindi raw totoo at gawa-gawa lamang. Papaano raw siyang aalis sa poder ni Ms. Joy Cancio, samantalang kasa-sign lang daw nito ng kontrata sa Focus E?
Kung iiwan daw niya ang Sexbomb at ang kanyang manager, noon pa daw sana niya ginawa ito. Masyadong matagal na raw ang pinagsamahan nila ng kanyang manager at ng Sexbomb girls at maganda naman daw ang kanilang naging pagsasama kaya naman daw bakit niya kailangang iwan ang kanyang manager at co-Sexbomb girls?
Basta sa ngayon daw, masaya raw siya sa pangangalaga ng kanyang manager kung saan tatlo ang kanyang regular show – ang Party Pilipinas, Show Me Da Manny at Ilumina. Trabaho raw ang gusto niya kaya naman daw anytime na kailangan siya ng grupo niyang Sexbomb at ‘di naman sagasa sa kanyang regular show, sasama at sasama siya para mag-show.
BONGGA ANG NAGING presentation ng launching ng Bench Perfume (Gutz) at Bench Time ng isa sa pinakamaningning na matinee idol sa bansa na si Richard Gutierrez, na ginanap sa Establishment sa The Fort last Nov. 15, kung saan isang napakaganda at pabolosong fashion show mula sa mga A1 Models sa bansa ang nagsilbing panimula, dala-dala ang Bench Perfume na iniendorso ni Richard na sinundan ng pagrampa ng mga modelo na dala naman ang Bench Time na iniendorso pa rin ng sikat na Kapuso actor.
Halos kumpleto at suportado si Richard ng kanyang pamilya mula sa kanyang Daddy Eddie, Mommy Annabelle, mga kapatid na sina Ruffa kasama ang dalawa nitong pretty daughters at si Raymond. Dumalo rin ang mga alaga ni Tita Annabelle na sina Ehra at Michelle Madrigal, Paolo at Bubbles Paraiso, Carla Humphries at John Hall. Present din ang may-ari ng Bench na si Mr. Bench Chan.
BLIND ITEM: SINO itong kontrabida aktres mula sa isang big TV network ang sinasabing maldita sa kanyang driver? Grabe raw kung sigaw-sigawan nito ang kanyang driver dahil sagad daw sa buto kung magalit ito.
Bagay na bagay raw nga ang role na ginagampanan nito sa mga serye ng big TV network na kanyang kinabibilangan dahil sa sama ng pag-uugali nito. Tsika pa ng aming source, na kinukuwentuhan nito ng kanyang ‘di magandang karanasan sa malditang aktres, na hindi na nga raw mabilang ng pobreng driver kung ilang mura na at pamamahiya ang inabot nito sa kamay ni kontrabida actress.
Kung madali nga lang daw humanap ng trabaho, matagal-tagal na raw iniwanan ng nasabing driver ang malditang aktres.
Ayaw lang daw nitong umalis dahil inaalala nito ang kanyang pamilya lalo na’t sasapit ang Kapaskuhan. Kaya naman daw tinatanggap na lang nito ang ginagawang pang-aalipusta at paninigaw sa kanya ng may kapangitang ugaling kontrabidang aktres.
Kung sa bagay, ilang aktres na ba sa nasabing TV network ang inaway nito? Siguro marami-rami na , pero hanggang ngayon, bongga pa rin ang posisyon ng malditang aktres at patuloy pa rin sa pagkakaroon ng magagandang proyekto, kahit masama ang ugali. ‘Yun na!
John’s Point
by John Fontanilla
