NALOKA AKO SA kuwentong nakarating sa akin tungkol dito sa young actress na sobrang maldita, ha?!
Naaaliw naman ako sa mga artistang may kamalditahan pero ‘yung pagsampal-sampalin mo ang sarili mong nanay ay hindi na yata kamalditahan ‘yun! Hindi ko naman yata matanggap ang ganu’n kasamang ugali.
Dati ay pinagtsitsismisan pa itong may kalandian. Ngayon naman, kasamaan na ng ugali ang isyu niya.
Kamakailan lang daw ito nangyari sa isang restaurant somewhere in Quezon City, kung saan sinundo na raw itong young actress ng mommy niya dahil sobrang lasing na.
Ayaw raw paawat itong hitad na ito, ayaw umuwi. Siyempre, hindi naman iiwan ng nanay niya sa gan’ung sitwasyon kaya kinulit itong umuwi na.
Nairita raw ito sa nanay niya, pinagsasampal ba naman! Sobra na ‘yan ‘di ba? Subukan niyang magpaka-sweet at i-deny ang isyung iyan at baka siya ang makatikim ng sampal mula sa akin.
Dati nga, nabalitaan ko rin na nakipag-away rin daw ito sa tiyahin niya na may mataas na posisyon sa isang network. Sa irita raw niya, hinablot ba naman ang blouse ng tita niya at napunit pa nga ito. Naku day! Huwag niyang gawin sa akin iyan at baka mukha niya ang mapunit.
Masama raw talaga ‘pag malasing ang babaeng ito kaya dapat habang bata pa siya, masuheto na para hindi humaba ang sungay.
Sobrang alaga pa naman ito ng network niya at pawang magagandang project ang ibinibigay sa kanya. Pero ganyan ang ugali niya, hindi maganda ang kababagsakan niya. Dapat na mapagsabihan ito at bigyan ng tamang disiplina.
Ayokong magbigay ng clue at baka mabanggit ko pa ang name. Sa susunod na lang, meron namang bagong show na pinu-promote iyan.
ANO NA NAMAN itong intrigang kinakalat ni Tita Swarding na may nabuntis daw si Ejay Falcon?
Kung sinu-sino itong babaeng nagsusumbong sa kanya, pinapatulan naman agad.
Ang bait ni Ejay at parang walang kamuwang-muwang pa ito na medyo aanga-anga pa nga minsan, nakabuntis na pala? Naku, Benjie Alipio sagutin mo ‘yan!
Kaya lang minsan naman hindi na kapani-paniwala ang ganu’ng isyu dahil depende naman sa babae kung kapatul-patol.
Gaya nu’ng kay Mark Herras na meron daw itong nabuntis, nanahimik naman at ang drama sa ibang bansa na lang daw manganganak. May ganu’n?
Hindi naman apektado si Mark sa intrigang ‘yun dahil hindi na bago iyan sa kanya. Pero ang unang kinausap pala at pinaliwanagan ni Mark nang lumabas ang isyung iyan ay si Ynna Asistio at ang pamilya nito.
Ganu’n ka-close si Mark kina Nadia Montenegro at siguro meron talagang namamagitan sa kanila ni Ynna kaya roon siya unang nag-explain na pinaniwalaan naman nina Ynna.
Sabi naman ni Ynna, hindi kapani-paniwala ang ganu’ng intriga kay Mark kaya dinedma na lang nila ito.
Magsasama pala itong sina Mark at Ynna sa bagong telebabad ng GMA-7 na Diva nina Regine Velasquez at Mark Anthony Fernandez.
ABANGAN N’YO PALA sa Sabado ang Startalk at may bago na naman kaming pasasabuging isyu.
May follow-up story kami sa mag-inang Marlene Aguilar-Pollard at Jason Ivler. Meron din kaming kuwento kay Jackie Rice at sa Mommy niyang si Vicky Sobreo-Rice na kinuha na niya pala ito sa Zambales para magsama sila uli.
Nagkahiwalay kasi ang Mommy at Daddy ni Jackie, kaya sinundo nito ang Mommy niya para magsama sila ng Daddy niya sa kanilang bahay, baka sakaling magkabalikan ang magulang niya. ‘Yun lang naman ang wish ni Jackie sa ngayon lalo na’t gumaganda ang career niya.
Mga Mata ni Lolita
by Lolit Solis
