NAKU MATAPOS ILABAS ni Madam Auring ang bago nitong boyfriend na siya mismo ay nagkakamali sa pangalan at apelyido, mukhang papatusin ni Madam ang bagong anggulo ng kanyang buhay – ang maging rape victim.
Nakakatawa talaga dahil noong puntahan namin si Madam Auring sa puwesto nito sa Victory Mall para interbyuhin, nagmumurang kamyas ito na panay ang sabing in love siya.
“Bakit ganoon, napag-uusapan lang ako ‘pag may bago akong boylet sa buhay?” Sabi ni Madam na sinusugan namin. “Madam, ano kaya kung mabalitaan naming na-rape ka?”
At dahil sa tanong namin, biglang pinamilugan ng mga mata ang kontrobersiyal na manghuhula.
“Bongga ‘yan, ha?! Maganda ‘yan!” Sabi ni Madam na ikinataas lang ng aming kilay kasabay ang mga lihim na halakhak.
Naku, hindi na kami magtataka kung isang araw ay ipangalandakan ni Madam Auring na biktima siya ng rape.
AMINADO SI MARIAN Rivera na gusto niyang magkaroon ng cameo role sa pelikulang pagsasamahan nina Dingdong Dantes at Kris Aquino.
“My God! Sobrang fan ako ni Kris, sabi ko nga kay Dong, sana kahit extra ay maging bahagi ako ng movie nila,” tumatawang pag-amin iyon ni Marian sa amin.
Ayon kay Marian, nang malaman daw niyang magkakaroon ng movie ang boyfriend na si Dingdong at Kris, siya ang unang na-excite.
“Gustung-gusto ko kasi ‘yung pagiging matapang at pagiging prangka ni Kris.”
Aminado si Marian na sa loob ng almost three years ay naging matatag sila ni Dingdong sa maraming pagsubok at intrigang dumating sa kanilang buhay.
“Yehey! Hindi sila nagtagumpay!” ‘Yun lang ang sabi ng aktres nang itanong namin sa kanya kung ano ang masasabi niya sa mga detractors nilang pilit na nagpapahiwalay sa kanila ni Dingdong.
At ang isa raw sa mga dahilan kung bakit hindi sila napaghihiwalay ni Dingdong ay dahil nagpapakatotoo lang daw sila sa kanilang sarili.
“Wala akong dapat na baguhin sa pagkatao ko dahil kung ano ako, ‘yun ang ginusto sa akin ni Dingdong,” pagwawakas ni Marian.
IMBIYERNA SI JENNYLYN Mercado sa isyung buntis siya. “Diyos ko, masama na ba ang magkasakit ngayon? Kapag nadala ka ba sa ospital, buntis ka na? Hindi ako buntis at hindi na uli ako magpapabuntis, ‘no?!”
Ayon kay Jennylyn, napakalaking gaga na raw niya na kung sa ikalawang pagkakataon ay muli siyang maging dalagang ina. “Diyos ko, nangyari na sa akin noong una, bakit hahayaan kong maulit pa?”
Pero hindi naman daw ibig sabihin noon ay pinagsisihan niyang naging dalagang ina siya, dahil napakabait at napaka-smart ng anak niyang si Alex Jazz. “Imposibleng gawin ko uli ‘yung mga naging pagkakamali ko nu’n. Siyempre kung magbubuntis ako, kasal ako du’n sa lalaking ama ng aking anak.”
Sa kabuuan, sinabi ni Jennylyn na sobrang happy siya sa takbo ng kanyang buhay dahil bukod sa may MMFF entry siyang Rosario, may Dennis Trillo pang nagmamahal sa kanya.
“Okay naman si Jazz at si Calix, ‘pag nagpupunta si Dennis sa bahay. Minsan kasama niya ‘yung anak nila ni Carlene (Aguilar), wala namang problema dahil naglalaro naman ang dalawang bata, okey naman sila.”
Inamin ni Jennylyn na this Christmas ay may plano sila ni Dennis na magkasama-sama sa isang lugar kasama ang iba pa nilang mahal sa buhay.
More Luck
by Morly Alinio
