Click to enlarge.
NAGSIMULA NANG MAG-TAPING ang Darna nu’ng nakaraang Biyernes at naantala nga ito ng napakalakas na ulan kaya medyo nahirapan sila sa unang araw nito.
Bago sila nagsimula, nagkaroon muna ng workshop si Marian Rivera bilang Darna sa limang babaeng kontrabida na madalas niyang makakalaban sa fantaseryeng ito na sina Iwa Moto, Nadine Samonte, Ehra Madrigal, Maggie Wilson at Krissa Mae Arrieta.
Si Iwa bale ang main villainess bilang Valentina. Pero matindi rin daw ang powers ng mga makakalaban dito ni Darna. Bukod pa riyan, paseksihan din sila ng costume.
Si Krissa Mae ang pumalit sa role na tinanggihan ni Isabel OIi.
Sa workshop ‘yun, naging bonding na rin pala nila. Para nga naman maging maganda ang takbo ng taping nila at doon nangako sila sa isa’t-isa na walang intrigahan, at sa kuwento ng Darna lang sila mag-aaway.
Kung sakaling si Isabel pa rin ang kasama nila sa grupong ‘yun, malamang na mapagbati sila ni Nadine.
Sabi naman ni Nadine, okay lang daw sa kanya na makatrabaho ang dating kaibigan pero hanggang trabaho na lang daw, dahil hindi pa rin ito handang magkaayos sila.
“Siguro magkakaayos kaming dalawa mismo pero kung may ibang tao na magsasabi magkaayos kayo, mas mahirap ‘yun kasi pinilit lang, eh. Siyempre, ‘di ba, kung ikaw mahirap pilitin ‘yung isang tao na hindi pa okey?” Pahayag ni Nadine.
Kung anuman ang alitan nila, mas focused naman ngayon si Isabel sa kanyang amang nasa Singapore. Hindi nga raw ito okey sa ngayon at any moment na may mangyari sa kanyang ama, biglang lilipad ito patungong Singapore.
Ani Isabel, ang totoong friendship, dapat may komunikasyon at pinag-uusapan kung meron mang problema. Pero mukhang hindi pa raw handa si Nadine kaya baka gusto raw nito ng space, hinahayaan na lang muna nila ito.
