IN FAIRNESS, ang laki na nga ng pinagbago ng katawan ni Dingdong Dantes, huh!
Nakita ko ‘yung huling pictorial niya sa Bench at ang plug ng My Beloved, ang laki nang ipinayat niya kaya balik na sa da-ting maganda ang katawan nito.
Sabi naman ni Dingdong, talagang kinarir niya ang pagpapayat dahil kailangan talaga. May mga eksena siyang isang anghel sa My Beloved at naka-topless ito kasama ang ibang mga hunks na nagagandahan din ang katawan kaya dapat hindi rin magpahuli si Dingdong, ‘no!
Dusa raw talaga ang mga pinagdaanan niya dahil bukod sa mga ensayo niya sa gym, nagda-diet ito na suportado pa ni Marian Rivera.
Sabi ng aktor, magaling daw ang cook niya na nagluluto sa kanya ng isda dahil ‘yun ang madalas niyang kinakain. Siyempre, kapag nagda-diet ka at gutom, minsan mainitin ang ulo mo. Mabuti na lang at nandiyan daw si Marian na sumusuporta sa kanya at nagbabalanse kapag bad mood ito.
At least maganda naman ang kinalabasan at proud si Dingdong dito.
Malapit nang magsimula ang My Beloved at abangan n’yo diyan dahil maaaliw kaya sa katawan ni Dingdong.
In fairness din kay Marian, ang laki rin ng iginanda nito nang magpagupit siya at sinasabi nga niyang lalo siyang na-inspire ngayon dahil ang taong mahal niya ang katrabaho.
ANG DAMING media ang dumagsa sa hearing nina Annabelle Rama at Nadia Montenegro sa San Juan Prosecutor’s Office nu’ng nakaraang Lunes.
Inaabangan na kasi baka may bagong gulo na namang mangyari kapag magsalubong ang dalawa. Pero parehong no show ang dalawa kaya walang aksyon na nangyari.
Ang abogado lang ni Nadia ang dumating at ang paralegal lang ng abogado ni Annabelle ang nag-represent sa kanila.
Kinunan ng Startalk ‘yun, at ang abogado lang ni Nadia na si Atty. Maggie Abraham ang nagsalita. Ayon sa kanya, pinapa-reset daw nina Annabelle ang hearing na ‘yun, pero kinontra niya ito.
Dapat daw kasi ay si Annabelle na ang magsa-submit ng reply sa counter-affidavit ni Nadia pero hindi nga ito sumipot kaya nagbigay daw ng stern warning ang fiscal na dapat ay dumalo na si Annabelle sa susunod na hearing sa darating na Lunes. Kung hindi pa rin ito sisipot sa Lunes, baka ibababa na raw ng fiscal ang resolution.
Malamang na maayos na ‘yan nina Annabelle, at magsa-submit na ito ng kanyang reply.
Pero hindi na raw muna pasisiputin si Nadia dahil hindi naman daw kaila-ngan. Iniiwasan na lang daw nila magkaroon pa uli ng gulo kaya mabuting huwag na raw muna silang magharap.
Pero saglit lang iyan dahil maghaharap pa rin ang mga ‘yan, dahil may kaso namang isinampa si Nadia at maghaharap din sila sa fiscal sa February 16.
Valentine’s day lang daw sila hindi maghaharap dahil bukod ‘yung sa San Juan Prosecutor’s Office, meron pa silang hearing uli sa Quezon City Prosecutor’s Office para harapin naman nila ang mga una pang kasong isinampa ni Nadia laban kay Annabelle.
Hay, naku! Marami pang eksenang mangyari. Aba-ngan na lang natin kung saan aabot ‘yan!
Mga Mata ni Lolita
by Lolit Solis
